കൊച്ചി: വിമാനത്താവളം വഴി സ്വര്ണ്ണക്കടത്ത് നടത്തിയ കേസില് എം ശിവശങ്കറിന് പ്രധാന പങ്കുണ്ടെന്ന് കസ്റ്റംസ് സംഘം. കേസുമായി ബന്ധപ്പെട്ട ശിവശങ്കറിനെ നേരിട്ട് ബന്ധിപ്പിക്കുന്ന തെളിവ് കിട്ടിയെന്നും കസ്റ്റംസ് സംഘം വ്യക്തമാക്കി. ശിവശങ്കറിന് സ്വര്ണകടത്തുമായി നേരിട്ട് ബന്ധമുണ്ടെന്ന് തെളിയിക്കാന് കഴിയുന്ന വിവരങ്ങള് കണ്ടെടുക്കാന് കഴിഞ്ഞെന്നാണ് കസ്റ്റംസ് കോടതിയില് സമര്പ്പിച്ച റിമാന്ഡ് എക്സ്റ്റെന്ഷന് റിപ്പോര്ട്ടില് പറയുന്നത്. കേരളത്തിന്റെ ചരിത്രത്തില് തന്നെ കേട്ടുകേള്വിയില്ലാത്ത സംഭവങ്ങളാണ് ഈ കേസില് നടന്നിട്ടുള്ളതെന്നും കസ്റ്റംസ് കോടതിയെ അറിയിച്ചു. അന്വേഷണവുമായി ഇപ്പോഴും ശിവശങ്കര് സഹകരിക്കുന്നില്ല. പ്രധാനപ്പെട്ട പല ചോദ്യങ്ങളില് നിന്നും അദ്ദേഹം ഇപ്പോഴും ഒഴിഞ്ഞ് മാറുകയാണ്. അതുകൊണ്ട് തന്നെ കൂടുതല് പേരെ ചോദ്യം ചെയ്യേണ്ട സാഹചര്യമാണുള്ളത്. എങ്കില് മാത്രമേ ഈ കേസിലെ ഗൂഢാലോചന സംബന്ധിച്ച വിവരങ്ങള് ലഭ്യമാകുകയുള്ളൂവെന്നും കസ്റ്റംസ് കോടതിയെ അറിയിച്ചു.