കൊച്ചി: ശബരിമല മാസപൂജ സമയത്ത് നിലയ്ക്കലിൽ നിന്ന് പമ്പയിലേക്ക് സ്വകാര്യ വാഹനങ്ങൾ കടത്തി വിടാൻ ഹൈക്കോടതി അനുമതി നൽകി . പ്രൈവറ്റ് സ്റ്റേജ് ക്യാരിയേഴ്സ് ഒഴികെ എല്ലാ വാഹനങ്ങളും പമ്പയിലേക്ക് കടത്തിവിടണമെന്നാണ് ദേവസ്വം ബെഞ്ച് സർക്കാരിന് നൽകിയ നിർദേശം.
പക്ഷെ ബേസ് ക്യാംപ് നിലയ്ക്കൽ ആയതിനാൽ തീർഥാടകരെ പമ്പയിൽ ഇറക്കിയശേഷം ഈ വാഹനങ്ങൾ തിരികെ നിലയ്ക്കലിലെത്തി പാർക്ക് ചെയ്യേണ്ടിവരും.
പമ്പയിലേക്ക്പോകുന്ന വാഹനങ്ങൾ തടയാൻ സർക്കാരിന് ആകില്ലെന്ന് കോടതി പറഞ്ഞു. വാഹനങ്ങൾ നിയന്ത്രിക്കാൻ മാത്രമേ അവകാശമുളളതെന്നും ഹൈക്കോടതി ചൂണ്ടിക്കാട്ടി.
നിലവിൽ നിലയ്ക്കലിൽ ഇറങ്ങിയശേഷം കെഎസ്ആർടിസി ബസിലാണ് തീർഥാടകർ പമ്പയിലേക്ക് പോകുന്നത്. കെഎസ്ആർടിസി ബസുകളുടെ ലഭ്യതക്കുറവും അവയിലെ അമിത ചാര്‍ജും തീർത്ഥാടകർക്ക് വലിയ ബുദ്ധിമുട്ടുകളാണ് സൃഷ്ടിച്ചിരുന്നത്.
