സ്ത്രീകൾ പ്രധാനമായും കഴിക്കേണ്ട പഴങ്ങള്‍ ഇവയാണ്; ഇനി അറിയാതെ പോകരുത്

എല്ലാ പഴവർഗങ്ങളും ആരോഗ്യത്തിന് നല്ലതുതന്നെയാണ് എന്നാൽ സ്ത്രീകളുടെ ആരോഗ്യത്തിന് പ്രയോജനകരമായ ചില പഴങ്ങളുണ്ട്. അവ എന്നും കഴിക്കുകയാണെങ്കിൽ ആരോഗ്യകരമായ ജീവിതം ആസ്വദിക്കാൻ സാധിക്കും.

സ്ത്രീകള്‍ക്കും പുരുഷന്മാര്‍ക്കും കുട്ടികള്‍ക്കും ഒരുപോലെ ഗുണകരമായ ഒരു പഴമാണ് ആപ്പിള്‍. സ്ത്രീകളില്‍ ഇത് ശരീരഭാരം കുറയ്ക്കാനും ഹൃദയത്തിന്റെ ആരോഗ്യം മെച്ചപ്പെടുത്താനും പ്രമേഹം നിയന്ത്രിക്കാനും സഹായിക്കും. അമേരിക്കന്‍ ജേണല്‍ ഓഫ് ക്ലിനിക്കല്‍ ന്യൂട്രീഷന്റെ പഠനമനുസരിച്ച്‌ സ്ഥിരമായി ആപ്പിള്‍ കഴിക്കുന്ന സ്ത്രീകള്‍ക്ക് കൊറോണറി പ്രശ്നങ്ങള്‍ ഉണ്ടാകാനുള്ള സാധ്യത 13 മുതല്‍ 22 ശതമാനം വരെ കുറവാണെന്ന് കണ്ടെത്തിയിട്ടുണ്ട്. സ്ത്രീകള്‍ ഇരുമ്പ് ഭക്ഷണത്തില്‍ കൂടുതൽ ഉള്‍പ്പെടുത്തുന്നത് വളരെ പ്രധാനമാണെന്നാണ് ഡോക്ടര്‍മാരടക്കം നിര്‍ദേശിക്കുന്നത്.

ആര്‍ത്തവവിരാമത്തിന്റെ നാളുകളില്‍ ശരീരത്തില്‍ പുകച്ചില്‍ അനുഭവപ്പെടുന്നതും രാത്രികാലങ്ങളില്‍ അസഹ്യമായി വിയര്‍ക്കുന്നതുമടക്കമുള്ള പ്രശ്നങ്ങള്‍ നേരിടാന്‍ മാതളം സഹായിക്കും. വിറ്റാമിന്‍ സി, വിറ്റാമിന്‍ ഇ, ഫോളിക് ആസിഡ് എന്നിവ മാതളനാരങ്ങയില്‍ അടങ്ങിയിട്ടുണ്ട്. ആരോഗ്യകരമായ ഗര്‍ഭധാരണത്തിനും ഗര്‍ഭം ധരിക്കാന്‍ ശ്രമിക്കുന്നവര്‍ക്കും ഇത് ഗുണം ചെയ്യും.

വിറ്റാമിന്‍ സി ധാരാളം അടങ്ങിയിട്ടുള്ളതാണ് ഓറഞ്ച്, നാരങ്ങ, മുന്തിരി എന്നീ പഴങ്ങള്‍. പ്രതിരോധശേഷി വര്‍ദ്ധിപ്പിക്കാന്‍ സഹായിക്കുന്നതാണ് ഇവ. സിട്രസ് അടങ്ങിയ പഴങ്ങളില്‍ ഹെസ്പെരിഡിന്‍ അടങ്ങിയിട്ടുള്ളതിനാല്‍ രക്താതിമര്‍ദ്ദം, ധമനികള്‍ കട്ടിയാക്കുന്നത്, അനാരോഗ്യകരമായ കൊളസ്ട്രോള്‍ എന്നിവ കുറയ്ക്കാന്‍ സഹായിക്കും.

സ്ത്രീകള്‍ക്ക് ഒരു പ്രായം കഴിഞ്ഞാൽ ഊര്‍ജ്ജം കുറയുന്നത് ഏറെ ഉത്‌കണ്‌ഠപ്പെടുത്തുന്നതാണ്. ഈ സാഹചര്യത്തില്‍ ഒഴിവാക്കരുതാത്ത ഒരു പഴമാണ് ചെറി. ചെറി പോലുള്ളവയില്‍ ഊര്‍ജ്ജം വര്‍ദ്ധിപ്പിക്കുന്ന ആന്തോസയാനിന്‍ ധാരാളമായി അടങ്ങിയിട്ടുണ്ട്. നിരവധി ആരോഗ്യ പ്രശ്‌നങ്ങളെ ചെറുക്കാന്‍ ചെറി ഉത്തമമാണ്. ആഴ്ചയില്‍ മൂന്നോ നാലോ തവണ ചെറി കഴിക്കുകയോ അതിന്റെ ജ്യൂസ് മധുരം ചേര്‍ക്കാതെ കുടുക്കുകയോ ചെയ്യണമെന്നാണ് വിദ​ഗ്ധര്‍ പറയുന്നത്.