ബംഗളൂരു: കര്ണാടകയില് രാഷ്ട്രീയ നേതാക്കളെയും വന് വ്യവസായികളെയും ഹണി ട്രാപ്പില് കുടുക്കി പണം തട്ടുന്ന സംഘത്തെ ക്രൈംബ്രാഞ്ച് അറസ്റ്റു ചെയ്തു. കര്ണാടകയിലെ ഒരു എംഎല്എയുടെ പരാതിയില് തുടങ്ങിയ അന്വേഷണത്തിലാണ് എട്ടംഗ സംഘം പിടിയിലായത്.
25 കോടി രൂപ ആവശ്യപ്പെട്ട് ഒരു യുവതി വിളിച്ചെന്ന രാഷ്ട്രീയ നേതാവിന്റെ പരാതിയില് നിന്നാണ് പോലീസ് അന്വേഷണം തുടങ്ങിയത്. നവംബര് 26 നാണ് സംഘം പൊലീസ് പിടിയിലാകുന്നത്. മൂന്നു വര്ഷമായി ബംഗളൂരുവില് വിവിധയിടങ്ങളില് ഇവര് സജീവമായി പ്രവര്ത്തിച്ചുവരികയായിരുന്നു.
അറസ്റ്റു ചെയ്തവരുടെ വിവരങ്ങള് ക്രൈംബ്രാഞ്ച് ഇതുവരെ പുറത്തുവിട്ടിട്ടില്ല. സംഘത്തിന്റെ മുഖ്യ സൂത്രധാരന് ആരാണെന്നുള്ള തിരച്ചിലിലാണ് പൊലീസ്. അറസ്റ്റിലായവരില് രണ്ടു സ്ത്രീകളുണ്ടെന്ന് ദേശീയ മാധ്യമങ്ങള് റിപ്പോര്ട്ട് ചെയ്തു.