അഡ്‌ലെയ്ഡ്: ഇന്ത്യ- ഓസീസ് ടെസ്റ്റ് പരമ്പരയിലെ ആദ്യ മത്സരം അഡ്‌ലെയ്ഡില്‍ പുരോഗമിക്കുകയാണ്. രണ്ടാം ദിനം ക്രിക്കറ്റ് ആരാധകരുടെ സംസാരം മുഴുവന്‍ ഇന്ത്യന്‍ പേസര്‍ മുഹമ്മദ് ഷമിയെ കുറിച്ചാണ്. ഷമിയുടെ ഇടതു കാലിലെ ഷൂവിലെ ദ്വാരമാണ് സംസാര വിഷയം. ഷമിയുടെ വിരല്‍ പുറത്തു കാണുന്ന വിധം വലുതാണ് ഈ ദ്വാരം. അതേസമയം ബിസിസിഐയ്ക്ക് ഒരു നല്ല ഷൂസ് പോലും ഇന്ത്യന്‍ താരങ്ങള്‍ക്കു നല്‍കാനുള്ള ശേഷിയില്ലേയെന്ന ചോദ്യമുയര്‍ത്തി ആരാകര്‍ രംഗത്തെത്തി.
എന്നാല്‍ സംഭവത്തിന്റെ സത്യാവസ്ഥ മറ്റൊന്നാണ്. ബോള്‍ ചെയ്യുമ്പോള്‍ ലാന്‍ഡിംഗിനിടെ കാല്‍വിരല്‍ സ്വതന്ത്രമാവുന്നതിനു വേണ്ടിയാണ് ഇങ്ങനെയൊരു ‘ദ്വാര തന്ത്രം’ ഷമി സ്വീകരിച്ചിരിക്കുന്നത്. കാല്‍വിരലിനു പരിക്കേല്‍ക്കുന്നത് കുറയ്ക്കാന്‍ ഇതു സഹായിക്കുകയും ചെയ്യും. പാകിസ്താന്റെ മുന്‍ ഫാസ്റ്റ് ബൗളര്‍മാരില്‍ ചിലര്‍ ഇതുപോലെ ഷൂവിന്റെ മുന്‍ഭാഗത്തായി ദ്വാരമിട്ടിരുന്നു. ഇതിനെ ഐസിസി വിലക്കിയിട്ടില്ലാത്തതിനാല്‍ തന്നെ ബൗളര്‍മാര്‍ക്കു ഇങ്ങനെയൊരു തന്ത്രം സ്വീകരിക്കുന്നതില്‍ തെറ്റുമില്ല.
