ടി20 ലോകകപ്പിൽ ഇന്ത്യ ഇന്ന് ദക്ഷിണാഫ്രിക്കയെ നേരിടും. ടൂർണമെന്റിന്റെ സെമി ഫൈനലിൽ തങ്ങളുടെ സ്ഥാനം ഉറപ്പിക്കാൻ ഇരുടീമുകളും തമ്മിൽ ഏറ്റുമുട്ടുമ്പോൾ തീപാറുമെന്ന് ഉറപ്പാണ്. രണ്ട് മത്സരങ്ങളും ജയിച്ച ഇന്ത്യ ഒന്നാമതും, ഒരു മത്സരത്തിൽ ജയവും, മറ്റൊരു മത്സരം മഴമൂലം ഉപേക്ഷിക്കുകയും ചെയ്തതിലൂടെ മൂന്ന് പോയിന്റുമായി ദക്ഷിണാഫ്രിക്ക രണ്ടാമതുമാണ് നിലവിൽ പോയിന്റ് പട്ടികയിലുള്ളത്.
ചരിത്രത്തിലെ ഏറ്റവും മികച്ച ലോകകപ്പ് ആവേണ്ടിയിരുന്നതാണ് ഇത്തവണത്തെ ടൂർണമെന്റ്. എന്നാൽ നാലോളം മത്സരങ്ങൾ മഴമൂലം മുടങ്ങി. ഇന്ത്യ-പാക് പോരാട്ടത്തിന് ശേഷം ഏറ്റവും കാത്തിരുന്ന ഇംഗ്ലണ്ട്-ഓസ്ട്രേലിയ മത്സരം പൂർണമായും ഉപേക്ഷിക്കേണ്ടി വന്നിരുന്നു. അതേസമയം ഇന്ന് നടക്കുന്ന മത്സരം വളരെ പ്രതീക്ഷയോടെയാണ് ആരാധകർ കാണുന്നത്.