ഹിസ്ബുള്ള ഭീകരർക്കായുള്ള ആയുധങ്ങളുമായി ഇറാൻ തലസ്ഥാനമായ ടെഹ്‌റാനില്‍നിന്ന് ടേക്ക് ഓഫ് ചെയ്ത വിമാനം യാത്ര റദ്ദാക്കി തിരികെ പറന്നതായി റിപ്പോര്‍ട്ട്. ഇസ്രയേൽ പ്രതിരോധ സേനയുടെ താക്കീതിനെത്തുടർന്നാണ് വിമാനം ഇറാഖിന്‍റെ വ്യോമാതിര്‍ത്തിയില്‍ നിന്ന് തിരികെ പറന്നതെന്ന് ഇസ്രയേൽ മാദ്ധ്യമങ്ങൾ റിപ്പോർട്ട് ചെയ്തു. ലെബനനോ സിറിയയോ ലക്ഷ്യമാക്കിയാണ് വിമാനം യാത്രതിരിച്ചതെന്നാണ് വിവരം.
ലെബനനില്‍ ഹിസ്ബുള്ള ഭീകരന്മാർക്കെതിരായ സൈനികനീക്കം തുടരുമെന്ന് ഇസ്രയേൽ അറിയിച്ചിട്ടുണ്ട്. ലെബനനിനും സിറിയയ്ക്കും ഇടയിലായി ഹിസ്ബുള്ള ഭീകരർ ഉപയോഗിച്ചിരുന്ന തുരങ്കം സൈന്യം തകർത്തിട്ടുണ്ട്. അതേസമയം ഹെഫയ്ക്ക് സമീപമുള്ള റാമത്ത് ദാവീദ് വ്യോമതാവളത്തില്‍ റോക്കറ്റാക്രമണം നടത്തിയതായി ഹിസ്ബുള്ള അവകാശപ്പെട്ടു. ലെബനന്‍ അതിര്‍ത്തിയില്‍നിന്ന് 45 കിലോമീറ്റര്‍ മാത്രം അകലെയാണ് ഈ വ്യോമതാവളം. എന്നാൽ ലെബനനില്‍ നിന്ന് ഇസ്രയേല്‍ അതിര്‍ത്തി കടന്നെത്തിയ റോക്കറ്റുകളെയും മിസൈലുകളെയും തകർത്തതായി ഇസ്രയേല്‍ വ്യോമസേന വ്യക്തമാക്കി.
