ഭീകരവാദത്തിനെതിരെ കടുത്ത തിരിച്ചടി; വെടിനിർത്തൽ ലംഘിച്ച ഹിസ്ബുള്ള താവളങ്ങൾ തകർത്ത് ഇസ്രയേൽ

ബെയ്റൂത്ത്:താൽക്കാലിക വെടിനിർത്തൽ കരാർ നിലവിലിരിക്കെ ഇസ്രയേലിന് നേരെ ഭീകര സംഘടനയായ ഹിസ്ബുള്ള നടത്തിയ റോക്കറ്റ് ആക്രമണങ്ങൾക്ക് ശക്തമായ ഭാഷയിൽ മറുപടി നൽകി ഇസ്രയേൽ പ്രതിരോധ സേന . ലബനൻ തലസ്ഥാനമായ ബെയ്റൂട്ടിന്റെ തെക്കൻ മേഖലയിലുള്ള (ദാഹിയ) ഹിസ്ബുള്ളയുടെ പ്രധാന ആസ്ഥാനങ്ങളും ഭീകരവാദ അടിസ്ഥാന സൗകര്യങ്ങളും ലക്ഷ്യമിട്ടാണ് ഇസ്രയേൽ വ്യോമസേന ശക്തമായ ആക്രമണം നടത്തിയത്. അതിർത്തി പ്രദേശങ്ങളായ യിഫ്താ, റാമോട്ട് നഫ്താലി എന്നിവടങ്ങളിലേക്ക് ഹിസ്ബുള്ള തൊടുത്തുവിട്ട റോക്കറ്റുകൾ വിജയകരമായി പ്രതിരോധിച്ചതിന് പിന്നാലെയാണ് ഭീകര കേന്ദ്രങ്ങൾ ഇല്ലാതാക്കാനുള്ള ഇസ്രയേലിന്റെ ഈ നിർണായക നടപടി.

അതിർത്തി കടന്നുള്ള ഭീകരവാദ നീക്കങ്ങൾക്കും ആക്രമണങ്ങൾക്കും എതിരെ രാജ്യം വിട്ടുവീഴ്ചയില്ലാത്ത നിലപാട് തുടരുമെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും പ്രതിരോധ മന്ത്രി ഇസ്രയേൽ കാറ്റ്സും സംയുക്ത പ്രസ്താവനയിലൂടെ വ്യക്തമാക്കി. തങ്ങളുടെ നഗരങ്ങളെയും പൗരന്മാരെയും ലക്ഷ്യമിട്ടുള്ള ഭീകരവാദികളുടെ ഏത് നീക്കത്തിനും അതിശക്തമായ തിരിച്ചടി നൽകാൻ സൈന്യത്തിന് നിർദ്ദേശം നൽകിയിട്ടുണ്ടെന്ന് ഇസ്രയേൽ നേതൃത്വം അറിയിച്ചു. സമാധാന ശ്രമങ്ങളെ അട്ടിമറിക്കുന്ന ഹിസ്ബുള്ളയുടെ റോക്കറ്റ് ലോഞ്ചറുകളും ഇസ്രയേൽ സൈന്യം വ്യോമാക്രമണത്തിലൂടെ പൂർണ്ണമായി തകർത്തു.

മേഖലയിൽ സമാധാനം പുനഃസ്ഥാപിക്കാൻ വാഷിംഗ്ടണിൽ വെച്ച് ഒപ്പുവെച്ച വെടിനിർത്തൽ കരാറിനെ പൂർണ്ണമായും അവഗണിച്ചുകൊണ്ടാണ് ഹിസ്ബുള്ള ഇസ്രയേലിന് നേരെ ആക്രമണം അഴിച്ചുവിട്ടത്. ഇത്തരം ഭീകരവാദ ഗ്രൂപ്പുകളുടെ അക്രമങ്ങൾക്ക് ഇരയാകാൻ ഇസ്രയേൽ തയ്യാറല്ലെന്നും സ്വന്തം രാജ്യത്തിന്റെ പരമാധികാരവും സുരക്ഷയും സംരക്ഷിക്കാൻ ഇനിയും ശക്തമായ സൈനിക നടപടികളുമായി മുന്നോട്ട് പോകുമെന്നും ഇസ്രയേൽ പ്രതിരോധ മന്ത്രാലയം വ്യക്തമാക്കി. വലിയ സ്ഫോടനങ്ങളാണ് ഹിസ്ബുള്ള കേന്ദ്രങ്ങളിൽ ഉണ്ടായതെന്നാണ് ലബനനിൽ നിന്നുള്ള പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.