ഇത് മഹാനടൻ മാത്രമല്ല; ഒരു നോ മതി ഞാനൊന്നും ഈ സിനിമയിലേ ഉണ്ടാകില്ല; മോഹൻലാലിനെക്കുറിച്ച് ഹരീഷ് പേരടി

സിനിമാപ്രേമികള്‍ വളരെ ആവേശത്തോടെ കാത്തിരിക്കുന്ന ചിത്രങ്ങളിലൊന്നാണ് ലിജോ ജോസ് പെല്ലിശ്ശേരിയുടെ മലൈക്കോട്ടൈ വാലിബന്‍. മോഹൻലാലാണ് ചിത്രത്തിൽ നായകനായി എത്തുന്നത്. ചിത്രത്തിന്‍റെ ഷൂട്ടിംഗ് രാജസ്ഥാനിൽ പുരോഗമിക്കുകയാണ്. കഴിഞ്ഞ ദിവസം യുവനടന്‍ മനോജ് മോസസിന്റെ പിറന്നാള്‍ ഷൂട്ടിങ്ങിനിടയിൽ ആഘോഷിച്ചിരുന്നു. ഇപ്പോൾ മോഹൻലാൽ എന്ന സാന്നിദ്ധ്യത്തെക്കുറിച്ച് പങ്കുവയ്ക്കുകയാണ് നടൻ ഹരീഷ് പേരടി. ഫേസ്ബുക്കിലാണ് നടൻ മോഹൻലാലിനെക്കുറിച്ച് കുറിച്ചിരിക്കുന്നത്.

ഫേസ്ബുക്ക് പോസ്റ്റിന്റെ പൂർണ്ണരൂപം:

ലിജോ അവതരിപ്പിക്കുന്ന പുതുമുഖ നടൻ മനോജിന്റെ പിറന്നാളാണ്. മുന്നിൽ നിൽക്കുന്ന ഞങ്ങളല്ല താരങ്ങൾ. വലിപ്പ ചെറുപ്പുമില്ലാതെ പകയും വിദ്വേഷവുമില്ലാതെ എല്ലാവരെയും കൂടെ നിർത്തുന്ന, എല്ലാവരെയും മുന്നിലേക്ക് തള്ളി നിർത്തുന്ന, ആ പിന്നിൽ നിൽക്കുന്ന ആ മഞ്ഞ കുപ്പായക്കാരനാണ് യഥാർത്ഥ താരം. നമ്മുടെ ലാലേട്ടൻ..അയാൾക്ക് പകരം മറ്റൊരാൾ ആയിരുന്നെങ്കിൽ ഒരു നോ മതി. ഞാനൊന്നും ഈ സിനിമയിലെ ഉണ്ടാകില്ല. പക്ഷെ ആ മനുഷ്യൻ എന്നോടെന്നല്ല ആരോടും അങ്ങിനെ പറയില്ല. അഭിമാനത്തോടെ ഞാൻ പറയും. ഇത് മഹാനടൻ മാത്രമല്ല. മഹാ മനുഷ്യത്വവുമാണ്. ഒരെയൊരു മോഹൻലാൽ