തീവ്രവാദ ഫണ്ടിംഗുമായി ബന്ധം; ജമാ അത്തെ ഇസ്ലാമി കേന്ദ്രങ്ങളിൽ എൻഐഎയുടെ മിന്നൽ പരിശോധന

ശ്രീനഗർ: കശ്മീരിലെ വിവിധ ഇടങ്ങളിൽ എൻഐഎ റെയ്ഡ്(NIA Raid). ജമാ അത്തെ ഇസ്ലാമിക്ക് തീവ്രവാദ ഫണ്ടിംഗുമായി ബന്ധമുണ്ടെന്ന വിവരത്തെത്തുടർന്നാണ് എൻഐഎ റെയ്ഡ് നടത്തുന്നത്. ജമാ അത്തെ ഇസ്ലാമിയുടെ കേന്ദ്രങ്ങളിലാണ് പ്രധാനമായും പരിശോധനകൾ നടന്നുകൊണ്ടിരിക്കുന്നത്.

കശ്മീർ പോലീസിന്റെയും സിആർപിഎഫിന്റെയും പിന്തുണയോടെ 12 ഇടങ്ങളിലായി പരിശോധന പുരോഗമിക്കുകയാണ്. ബുദ്ഗാം, ബന്ദിപോറ ഉൾപ്പെടെയുളള ജില്ലകളിലാണ് മിന്നൽ പരിശോധന. ജമാ അത്തെ ഇസ്ലാമിയുമായി ബന്ധമുണ്ടെന്ന് സംശയിക്കുന്ന മുൻ സർക്കാർ ജീവനക്കാരനായ മുഹമ്മദ് അക്രം ഉൾപ്പടെയുള്ളവരുടെ വീടുകളിലും പരിശോധനകൾ നടക്കുന്നുണ്ട്. തീവ്രവാദ ഫണ്ടിംഗുമായി ബന്ധപ്പെട്ട് രണ്ട് മാസം മുൻപും ജമ്മു കശ്മീരിൽ റെയ്ഡ് നടത്തിയിരുന്നു. തുടർന്ന് നിരവധി പേരെ പിടികൂടുകയുമുണ്ടായി.

അതേസമയം കഴിഞ്ഞ കുറച്ചുദിവസങ്ങളായി കശ്മീരിൽ ഭീകരാക്രമണം തുടരുകയാണ്. തുടരെതുടരെയുണ്ടായ ആക്രമണങ്ങളിൽ പതിനഞ്ചോളം ഭീകരരെയാണ് സൈന്യം വകവരുത്തിയത്. പൂഞ്ച് മേഖലയിൽ ഇപ്പോഴും ഭീകരർക്കായി തിരച്ചിൽ ഊർജ്ജിതമാക്കിയിരിക്കുകയാണ് സൈന്യം.