ദില്ലി: കോണ്ഗ്രസില് പ്രവേശിക്കുന്നില്ലെന്ന തീരുമാനത്തിന് പിന്നാലെ പുതിയ നീക്കവുമായി തിരഞ്ഞെടുപ്പ് തന്ത്രജ്ഞന് പ്രശാന്ത് കിഷോര്. പുനരുജ്ജീവനത്തിനായി കോണ്ഗ്രസിനെ സമീപിച്ച പ്രശാന്ത് കിഷോര് പാര്ട്ടിയിലേക്കുള്ള സോണിയ ഗാന്ധിയുടെ ക്ഷണം കഴിഞ്ഞ ആഴ്ച നിരാകരിച്ചിരുന്നു.
ഇതിന് പിന്നാലെയാണ് ഇപ്പോൾ ജന്സുരാജ് എന്ന പേരില് പുതിയ പാര്ട്ടി രൂപീകരിക്കുന്നു എന്ന വാർത്ത പുറത്ത് വരുന്നത്. ഇന്ന് രാവിലെ പ്രശാന്ത് കിഷോര് പങ്കുവെച്ച ട്വീറ്റാണ് വർത്തയാകുന്നത്. മാത്രമല്ല ബിഹാറില് നിന്ന് തുടങ്ങുന്നുവെന്നാണ് പ്രശാന്ത് കിഷോര് പുതിയ രാഷ്ട്രീയ പാര്ട്ടിയായ ജന് സുരാജിന്റെ പ്രഖ്യാനം നടത്തികൊണ്ട് ട്വിറ്ററിലൂടെ അറിയിച്ചിരിക്കുന്നത്.
ജനാധിപത്യത്തില് അര്ഥവത്തായ പങ്കാളിയാകാനും ജനപക്ഷ നയം രൂപപ്പെടുത്താനുമുള്ള തന്റെ അന്വേഷണം 10 വര്ഷത്തെ റോളര്കോസ്റ്റര് യാത്രയിലേക്ക് നയിച്ചു. യഥാര്ത്ഥ മാസ്റ്റേഴ്സിലേക്ക് പോകാനുള്ള സമയമായി. ജനങ്ങളുടെ സദ്ഭരണത്തിലേക്കുള്ള പാതയും പ്രശ്നങ്ങളും നന്നായി മനസ്സിലാക്കാനുള്ള തുടക്കം ബിഹാറില് നിന്നായിരിക്കും- എന്നാണ് പ്രശാന്ത് കിഷോര് ട്വീറ്റ് ചെയ്തത്.
അതേസമയം ജന്സുരാജ് എന്ന വാക്കാണ് പുതിയ അഭ്യൂഹങ്ങള്ക്ക് തുടക്കം കുറിച്ചിരിക്കുന്നത്. ‘ജന്സുരാജ്’ എന്നത് പുതിയ രാഷ്ട്രീയ പാര്ട്ടിയാണോ മറ്റേതെങ്കിലും തരത്തിലുള്ള രാഷ്ട്രീയ നീക്കമാണോ എന്നതില് വ്യക്തയില്ല.