ജീവകാരുണ്യ പ്രവർത്തന ഫണ്ട് തട്ടിപ്പ്; റാണ അയൂബിനെതിരെ കേസെടുത്ത് യുപി പോലീസ്

ദില്ലി: ജീവകാരുണ്യ പ്രവർത്തന ഫണ്ട് തട്ടിയതിന് പ്രമുഖ വനിത മാധ്യമ പ്രവർത്തക റാണ അയൂബിനെതിരെ കേസെടുത്ത് യു.പി പോലീസ്. ഹിന്ദു ഐ.ടി സെൽ നൽകിയ പരാതിയുടെ അടിസ്ഥാനത്തിലാണ്​ ഗാസിയാബാദ്​ പോലീസ് റാണയ്ക്കെതിരെ കേസെടുത്തത്.

ജീവകാരുണ്യ പ്രവർത്തന ഫണ്ട്​ വെട്ടിപ്പിനു പുറമെ റാണ അയൂബിനെതിരെ വഞ്ചന, കള്ളപ്പണ ഇടപാട്​, തുടങ്ങിയ കേസുകൾ കൂടി ചേർത്താണ് പോലീസ് എഫ്‌ഐആർ രജിസ്റ്റർ ചെയ്തിരിക്കുന്നത്.
അസം, ബീഹാർ, മഹാരാഷ്​ട്ര തുടങ്ങിയ സംസ്​ഥാനങ്ങളിൽ കോവിഡ്​ ബാധിതരെയും പ്രളയബാധിതരെയും സഹായിക്കാൻ പണം പിരിച്ചുവെന്നും അതിൽ ക്രമക്കേടുണ്ടെന്നുമാണ്​ പരാതിയിൽ ഹിന്ദു ഐ.ടി സെൽ ആരോപിച്ചിരിക്കുന്നത്. എന്നാൽ ജീവകാരുണ്യ പ്രവർത്തനങ്ങളുടെ​ പേരിൽ ഓൺലൈനായി ഫണ്ട്​ പിരിച്ചത്​ സർക്കാരിന്റെ അനുമതി കൂടാതെയുമായായിരുന്നു.

ഈ പരാതികളിൽ അന്വേഷണത്തിനു ശേഷം തുടർ നടപടികൾ സ്വീകരിക്കുമെന്ന്​ പോലീസ്​ അറിയിച്ചു. അതേസമയം ഗാസിയാബാദിൽ 72കാരനായ വയോധികനെ തട്ടിക്കൊണ്ടു പോകുകയും ‘ജയ്​ ശ്രീറാം’ വിളിക്കാൻ മടിച്ചതിന്​ താടി മുറിക്കുകയും ചെയ്​തതിന്റെ വ്യാജ വീഡിയോ പ്രചരിപ്പിച്ചുവെന്നതിന്​ റാണ അയൂബിനെതിരെ ഐ.ടി നിയമപ്രകാരം നേരത്തെ കേസെടുത്തിരുന്നു. അതിനുപിന്നാലെയാണ് വീണ്ടും റാണയ്‌ക്കെതിരെ പോലീസിന് പരാതി ലഭിച്ചിരിക്കുന്നത്.എന്നാൽ കേസ് അന്വേഷിച്ച് റാണയ്‌ക്കെതിരെ വ്യക്തമായ തെളിവുകൾ കണ്ടെത്തിയതിന് ശേഷം നിയമനടപടികൾ സ്വീകരിക്കൂമെന്ന് മുതിർന്ന പോലീസ് ഉദ്യോഗസ്ഥൻ ജ്ഞാനേന്ദ്ര സിംഗ് മാധ്യമങ്ങളോട് പറഞ്ഞു.