ഇതെന്താ പാകിസ്ഥാനാണോ? ഭീകര സംഘടനകൾക്ക് സർക്കാർ പരിശീലനം നൽകുന്ന സ്ഥലമായി കേരളം; മുഖ്യമന്ത്രിയുടെ അറിവോടെയെന്ന് കെ.സുരേന്ദ്രൻ

തിരുവനന്തപുരം: കഴിഞ്ഞ ദിവസം ആലുവയിൽ പോപ്പുലർ ഫ്രണ്ട് സംഘടിപ്പിച്ച പരിപാടിയിൽ അഗ്നിശമനസേനാംഗങ്ങൾ പങ്കെടുത്ത് പരിശീലനം നൽകിയ സംഭവം വിവാദത്തിൽ. പോപ്പുലർ ഫ്രണ്ട് പ്രവർത്തകർക്ക് അഗ്‌നിശമന സേനയുടെ പരിശീലനം ഏർപ്പെടുത്തിയത് മുഖ്യമന്ത്രിയുടെ അറിവോടെയാണെന്ന വിമർശനവുമായി ബിജെപി സംസ്ഥാന പ്രസിഡന്റ് കെ സുരേന്ദ്രൻ.

ദുരന്തമുഖത്തെ രക്ഷാപ്രവർത്തനത്തിന് എന്ന പേരിൽ നൽകിയ പരിശീലനം വിവാദമായതിന് പിന്നാലെയാണ് കെ സുരേന്ദ്രന്റെ പ്രതികരണം. കേരളം പാകിസ്ഥാനെപ്പോലെ ഭീകരസംഘടനകൾക്ക് സർക്കാർ തന്നെ പരിശീലനം നൽകുന്ന സ്ഥലമായി മാറിയെന്ന് അദ്ദേഹം പറഞ്ഞു. മാത്രമല്ല എല്ലാ സർക്കാർ ഫോഴ്‌സുകളെയും നിയന്ത്രിക്കുന്നത് പോപ്പുലർ ഫ്രണ്ടുകാരാണെന്നും സുരേന്ദ്രൻ വ്യക്തമാക്കി.

അതേസമയം പോപ്പുലർ ഫ്രണ്ടിന്റെ സംസ്ഥാനതല ഉദ്ഘാടനപരിപാടിയിലാണ് അഗ്നിശമന സേനയിലെ അംഗങ്ങൾ എത്തി പരിശീലനം നൽകിയത്. ഇത് ഉന്നത ഭരണ നേതൃത്വത്തിന്റെ അറിവോടെയാണെന്നതിന് ഉദാഹരണമാണെന്ന് വ്യക്തമായി. അതിനാൽ ദേശവിരുദ്ധ സ്വഭാവമുള്ള സംഘടനയ്‌ക്ക് പരിശീലനം നൽകിയ അഗ്നിശമന സേനാ ഉദ്യോഗസ്ഥരെ സർവ്വീസിൽ നിന്നും പുറത്താക്കണമെന്നും കെ സുരേന്ദ്രൻ ആവശ്യപ്പെട്ടു.

മാത്രമല്ല അഗ്നിശമന സേന ഉദ്യോഗസ്ഥർ പോപ്പുലർ ഫ്രണ്ട് നേതാക്കളിൽ നിന്നും പരിശീലകർക്കുള്ള ഉപഹാരം സ്വീകരിച്ചത് ലജ്ജാകരമാണെന്നും നിയമസഭാ തെരഞ്ഞെടുപ്പിൽ ലഭിച്ച പിന്തുണയുടെ പ്രത്യുപകാരമാണ് പിണറായി പോപ്പുലർ ഫ്രണ്ടിന് നൽകുന്നതെന്നും സുരേന്ദ്രൻ പറഞ്ഞു.

റസ്‌ക്യൂ ആൻഡ് റിലീഫ് എന്ന സംഘടനയ്‌ക്ക് പോപ്പുലർ ഫ്രണ്ട് രൂപം നൽകിയത് ദുരന്തമുഖത്ത് രക്ഷാപ്രവർത്തനത്തിന് എന്ന പേരിലാണ്. കൂടാതെ പൾമറി റെസിസിറ്റേഷൻ (പുനരുജ്ജീവന ചികിത്സ) ഫയർ ആൻഡ് റസ്‌ക്യൂ ഓപ്പറേഷൻ തുടങ്ങിയ മേഖലയിലാണ് പോപ്പുലർ ഫ്രണ്ട് പ്രവർത്തകർക്ക് പരിശീലനം നൽകിയത്. രാഷ്‌ട്രീയ സംഘടനകൾ ഉൾപ്പെടെ വേദിയിൽ ഔദ്യോഗിക വേഷത്തിൽ പങ്കെടുക്കാൻ പാടില്ലെന്നിരിക്കെയാണ് മതമൗലിക സംഘടനയായ പോപ്പുലർ ഫ്രണ്ടിന്റെ വേദിയിൽ പ്രവർത്തകർക്ക് പരിശീലനം നൽകിയത്. എന്നാൽ ഇത് സർവ്വീസ് ചട്ടലംഘനമാണെന്ന് ചൂണ്ടിക്കാട്ടി അഗ്നിശമനസേനാംഗങ്ങൾക്ക് ഇടയിൽ തന്നെ പ്രശ്‍നങ്ങളുണ്ട്.