ദില്ലി: പതിനഞ്ചുവയസുകാരനെതിരെ പ്രകൃതിവിരുദ്ധ പീഡനം. പ്രായപൂർത്തിയാകാത്ത ആൺകുട്ടിയെ പീഡിപ്പിച്ച പരാതിയിൽ കബഡി പരിശീലകന് അറസ്റ്റില്. ദില്ലിയിലെ രോഹിണി ജില്ലയിലെ ഒരു ഗ്രാമത്തിലാണ് സംഭവം നടന്നത്. കുട്ടിയെ കബഡി പരിശീലകന് പലതവണ ലൈംഗികമായി പീഡിപ്പിച്ചെന്നാണ് പരാതി. കുട്ടിയുടെ രക്ഷിതാക്കള് പൊലീസില് പരാതിപെട്ടതിനെ തുടർന്നായിരുന്നു നടപടി.
കബഡി പരിശീലന കേന്ദ്രത്തില് വെച്ചാണ് പീഡനം നടന്നതെന്ന് പൊലീസ് പറയുന്നു.. കുട്ടിയുടെ പെരുമാറ്റത്തില് അസ്വഭാവികത തോന്നിയ രക്ഷിതാക്കള് കാര്യം അന്വേഷിച്ചപ്പോഴാണ് പീഡനവിവരം പുറത്തറിയുന്നത്. പീഡന വിവരം പുറത്ത് പറയരുതെന്ന് കബഡി പരിശീലകന് കുട്ടിയെ ഭീഷണിപ്പെടുത്തിയിരുന്നതായി പരാതിയില് പറയുന്നു.
പ്രാഥമിക അന്വേഷണത്തില് പ്രതി കുറ്റക്കാരനാണെന്ന് കണ്ടെത്തിതായി പൊലീസ് പറഞ്ഞു. ഇതോടെ പോക്സോ വകുപ്പുള്പ്പടെ ചുമത്തി പരിശീലകനെ പൊലീസ് അറസ്റ്റ് ചെയ്തു.. ഇയാള് കബഡി പരിശീലന കേന്ദ്രത്തിലെ മറ്റ് കുട്ടികളെ ലൈംഗിക ചൂഷണത്തിന് ഇരയാക്കിയിട്ടുണ്ടോ എന്ന് പരിശോധിക്കും പീഡനത്തിനിരയായ ആണ്കുട്ടിയെ വൈദ്യപരിശോധനയ്ക്കും മൊഴിയെടുക്കലിനും ശേഷം ബന്ധുക്കള്ക്കൊപ്പം വിട്ടു. പ്രതിയെ കോടതിയില് ഹാജരാക്കി റിമാന്ഡ് ചെയ്തു.
