കണ്ണൂര്: ടിടിആര് ചമഞ്ഞ് ഇന്ത്യൻ റെയിൽവേയിൽ ജോലി വാഗ്ദാനം ചെയ്ത് തൊഴിലന്വേഷകരില് നിന്നും പണം വാങ്ങിയെന്ന പരാതിയില് യുവതി അറസ്റ്റില്. ഇരിട്ടി പൊലീസ് സ്റ്റേഷന് പരിധിയില്പെട്ട ബിന്ഷ ഐസകിനെയാണ് കണ്ണൂര് ടൗണ് പൊലീസ് പിടികൂടിയത്. യുവതിയെ കാണാതായതിനെ തുടര്ന്ന് ഭര്ത്താവ് നല്കിയ പരാതിയില് അന്വേഷണം തുടരവെയാണ് കണ്ണൂര് ആര്പിഎഫിന്റെ പിടിയിലായത്.
റെയില്വേയില് ജോലിയുണ്ടെന്ന് പറഞ്ഞ് യുവാവിനെ വിവാഹം കഴിച്ചുവെന്ന പരാതിയും ഇവര്ക്കെതിരെയുണ്ടെന്ന് പൊലീസ് വ്യക്തമാക്കി. എന്നും രാവിലെ യുവാവ് ബിന്ഷയെ റെയില്വേ സ്റ്റേഷനില് ജോലിക്കായി കൊണ്ടുവിടും. എന്നാല് കഴിഞ്ഞ രണ്ട് ദിവസമായി ജോലിക്ക് പോയ ബിന്ഷയെ കാണാത്തതിനെ തുടര്ന്ന് ഭര്ത്താവ് പൊലീസില് പരാതി നല്കിയിരുന്നു.
ആര്പിഎഫ് കണ്ണൂര് ടൗണ് പൊലീസിന് കൈമാറിയ ഇവരെ ചോദ്യം ചെയ്തപ്പോഴാണ് ജോലി വാഗ്ദാനം ചെയ്ത് പലരേയും വഞ്ചിച്ചതായി അറിയുന്നത്. റെയില്വേയില് ജോലി തരപ്പെടുത്തി തരാമെന്ന് പറഞ്ഞാണ് പണം വാങ്ങിയത്. മാസങ്ങള് കഴിഞ്ഞും ജോലി ലഭിക്കാതായതോടെ പലരും പരാതി പറഞ്ഞ് രംഗത്തെത്തി. ഇതിനിടെയാണ് യുവതി നാടുവിട്ടത്. കണ്ണൂര് ടൗണ് പൊലീസ് ഇന്സ്പെക്ടര് ശ്രീജിത്ത് കൊടേരിയുടെ നേതൃത്വത്തിൽ കേസ് അന്വേഷണം ആരംഭിച്ചിട്ടുണ്ട്.
