ഒറ്റപ്പാലം: വെള്ളമാണെന്ന് തെറ്റിദ്ധരിച്ച് ആസിഡ് കുടിച്ചയാൾക്ക് ദാരുണാന്ത്യം. പാലക്കാട് ഒറ്റപ്പാലം വേങ്ങശേരി സ്വദേശി താനിക്കോട്ടിൽ രാധാകൃഷ്ണനാണ് ചികിത്സയിലിരിക്കെ മരിച്ചത്. കഴിഞ്ഞ മാസം അഞ്ചാം തീയതിയാണ് വെള്ളമെന്ന് തെറ്റിദ്ധരിച്ച് രാധാകൃഷ്ണൻ ആസിഡ് കുടിച്ചത്.
സെവൻഅപ്പിന്റെ കുപ്പിയിലായിരുന്നു ആസിഡ് സൂക്ഷിച്ചിരുന്നതെന്നാണ് ബന്ധുക്കൾ പറയുന്നത്. ഉടൻതന്നെ ഒറ്റപ്പാലത്തെ സ്വകാര്യ ആശുപത്രിയിലെത്തിച്ചു. എന്നാൽ, സ്ഥിതി വഷളായതോടെ പെരിന്തൽമണ്ണയിലെ ആശുപത്രിയിലേക്ക് മാറ്റി. പിന്നീട് അവിടെനിന്ന് തൃശ്ശൂർ മെഡിക്കൽ കോളേജിലേക്കും മാറ്റുകയായിരുന്നു. ഇലക്ട്രോണിക്സ് സാധനങ്ങൾ റിപ്പയർചെയ്യുന്ന സ്ഥാപനം നടത്തുന്നയാളാണ് രാധാകൃഷ്ണൻ. ജോലിയുമായി ബന്ധപ്പെട്ടാണ് ആസിഡ് സൂക്ഷിച്ചതെന്നാണ് ബന്ധുക്കൾ പറയുന്നത്.
