ഈ കർക്കടകത്തിൽ ആദ്യത്തെ ദിവസവും അവസാന ദിവസവും കറുത്തവാവ്; പിതൃദർപ്പണത്തിന് ഏത് ദിവസം അനുയോജ്യം? പ്രശസ്ത ജ്യോതിഷാചാര്യൻ പാൽക്കുളങ്ങര ഗണപതി പോറ്റി പറയുന്നത് ഇങ്ങനെ

തിരുവനന്തപുരം: രാമായണമാസമായ കർക്കടകത്തിൽ മലയാളിക്ക് ഏറ്റവും പ്രധാനപ്പെട്ട ദിവസമാണ് കർക്കടകത്തിലെ കറുത്ത വാവ്. ജാതി മത ഭേദമന്യേ മലയാളികൾ ഈ പുണ്യ ദിനത്തിൽ പിതൃപൂജ നടത്തുന്നു. നാടൊട്ടുക്കുമുള്ള ചെറുതും വലുതുമായ പുണ്യ തീർത്ഥ ഘട്ടങ്ങളിലും ക്ഷേത്രങ്ങളിലും പിതൃബലിയും തിലഹോമാദി പൂജകളും അന്നേദിവസം നടക്കും. എന്നാൽ ഇക്കൊല്ലത്തെ കർക്കടകത്തിൽ രണ്ട് കറുത്തവാവുകളുണ്ട്. ഈ കർക്കടകത്തിലെ ആദ്യദിനവും അവസാന ദിനവും കറുത്തവാവാണ്. ജൂലൈ 17 കറക്കടകം ഒന്നും ആഗസ്റ്റ് 16 കർക്കടകം 31 ഉം അമാവാസിയാണ്. ഇതിൽ ഏത് ദിവസമാണ് പിതൃ പൂജ ചെയ്യേണ്ടതെന്ന സംശയം ചിലർക്കെങ്കിലുമുണ്ട്. ഈക്കാര്യത്തിൽ സംശയ നിവാരണം നടത്തുകയാണ് പ്രശസ്ത ജ്യോതിഷ പണ്ഡിതനായ പാൽകുളങ്ങര ഗണപതി പോറ്റി. രണ്ടു ദിവസങ്ങളിലും പിതൃതർപ്പണം നടത്താമെങ്കിലും പ്രാധാന്യം ആദ്യത്തേതിനാണെന്ന് അദ്ദേഹം പറയുന്നു. തത്വമയി എല്ലാ ഞായറാഴ്ചയും സംപ്രേക്ഷണം ചെയ്യുന്ന ജ്യോതിഷ പരിപാടിയായ ചൈതന്യത്തിൽ സംസാരിക്കുമ്പോഴാണ് കർക്കടക വാവുബലി സംബന്ധിച്ച സംശയ നിവാരണം നടത്തിയത്.

പുണ്യ പൂർവ്വ പിതൃക്കളുടെ മോക്ഷ, മുക്തി, സായൂജ്യങ്ങൾ ജീവിച്ചിരിക്കുന്ന അവരുടെ പിൻതലമുറക്കാരുമായി ബന്ധപ്പെട്ടിരിക്കുന്നു. അതിനാൽ പിതൃപൂജ അഥവാ പിതൃതർപ്പണത്തിന് ജീവിതത്തിൽ അതീവ പ്രാധാന്യമുണ്ടെന്ന് അദ്ദേഹം പറഞ്ഞു. പിതൃതർപ്പണത്തിന് ശുദ്ധി വളരെ പ്രധാനമാണെന്നും ത്രിശുദ്ധി എന്നറിയപ്പെടുന്ന ശരീര ശുദ്ധിയും, മനഃശുദ്ധിയും, കർമ്മശുദ്ധിയും പിതൃതർപ്പണ സമയത്ത് പാലിക്കേണ്ടതുണ്ടെന്നും, എള്ള്, നെയ്യ്, ഉണക്കലരി തുടങ്ങിയ ഹവിസുകൾ ജലത്തിൽ ജലജീവികളോ കരയിൽ ബലിക്കാക്കയോ സ്വീകരിക്കുന്നതോടെ ലഭിക്കുന്ന പിതൃക്കളുടെ അനുഗ്രഹാശിസ്സുകൾ ഓരോ കുടുംബത്തിനും പ്രധാനമാണെന്നും അദ്ദേഹം പറഞ്ഞു. ഈയാഴ്ചത്തെ ചൈതന്യം എപ്പിസോഡ് കാണാനായി ഈ ലിങ്കിൽ ക്ലിക്ക് ചെയ്യുക.