തിരുവനന്തപുരം: തദ്ദേശ തെരഞ്ഞെടുപ്പ് വോട്ടെണ്ണല് ക്രമീകരണത്തിന് മാര്ഗനിര്ദേശമായി. മൂന്നുഘട്ടമായി നടക്കുന്ന തെരഞ്ഞെടുപ്പിന്റെ വോട്ടെണ്ണല് ഡിസംബര് 16ന് രാവിലെ എട്ട് മുതലാണ് ആരംഭിക്കുക. എല്ലാ തദ്ദേശ സ്ഥാപനങ്ങളുടെയും വോട്ടെണ്ണല് 16 ന് രാവിലെ എട്ടു മുതലാണ് ആരംഭിക്കുന്നത്. ത്രിതല പഞ്ചായത്തുകളെ സംബന്ധിച്ചു ബ്ലോക്ക് തലത്തിലുള്ള വിതരണ സ്വീകരണ കേന്ദ്രങ്ങളും മുനിസിപ്പാലിറ്റി, കോര്പ്പറേഷനുകളെ സംബന്ധിച്ച് അതത് സ്ഥാപനങ്ങളുടെ വിതരണ സ്വീകരണ കേന്ദ്രങ്ങളുമാണ് വോട്ടെണ്ണല് കേന്ദ്രങ്ങളായി നിശ്ചയിച്ചിട്ടുള്ളത്. പോസ്റ്റല് വോട്ടുകളാണ് ആദ്യം എണ്ണുക. ഗ്രാമപഞ്ചായത്തുകളിലെയും ബ്ലോക്ക് പഞ്ചായത്തുകളിലെയും ജില്ലാ പഞ്ചായത്തുകളിലെയും പോസ്റ്റല് വോട്ടുകള് അതാത് വരണാധികാരികളാണ് എണ്ണുക. ട്രെന്ഡ് സോഫ്റ്റ് വെയറിലേയ്ക്ക് വോട്ടിംഗ് വിവരം അപ്ലോഡ് ചെയ്യാനായി കൗണ്ടിംഗ് സെന്ററില് ബ്ലോക്ക് വരണാധികാരിയുടെ ഹാളിന് സമീപവും, നഗരസഭകളിലെ കൗണ്ടിംഗ് സെന്ററുകളിലും ഡേറ്റാ അപ്ലോഡിംഗ് സെന്ററിന് വേണ്ടി പ്രത്യേക മുറി സജ്ജീകരിക്കും. ഓരോ പോളിംഗ് സ്റ്റേഷന്റെയും വോട്ട് നിലവാരം രേഖപ്പെടുത്തുന്നതിന് ട്രെന്ഡ് സൈറ്റില് നിന്ന് കൗണ്ടിംഗ് സ്ലിപ്പ് മുന്കൂറായി ഡൗണ് ലോഡ് ചെയ്ത് പ്രിന്റ് എടുക്കണം.