തിരുവനന്തപുരം: ഇത്തവണത്തെ സന്തോഷ് ട്രോഫി ദേശീയ സീനിയര് ഫുട്ബോള് ചാമ്പ്യൻഷിപ്പിന്റെ ഫൈനല് റൗണ്ടിന് കേരളം വേദിയാകും. ഓള് ഇന്ത്യ ഫുട്ബോള് ഫെഡറേഷനുമായി ധാരണയിലെത്തിയെന്ന് മന്ത്രി വി.അബ്ദുറഹിമാന് പറഞ്ഞു.ആണ്കുട്ടികളുടെയും പെണ്കുട്ടികളുടെയും ദേശീയ ജൂനിയര്, സബ്ജൂനിയര് ചാമ്പ്യന്ഷിപ്പുകളും കേരളത്തില് നടത്തുമെന്നും കായികമന്ത്രി വി അബ്ദുറഹിമാന് വാര്ത്താസമ്മേളനത്തില് അറിയിച്ചു.
ലോക വനിതാ ഫുട്ബോളിലെ 4 പ്രമുഖ രാജ്യങ്ങള് പങ്കെടുക്കുന്ന അന്താരാഷ്ട്ര ഫുട്ബോള് ചാമ്പ്യന്ഷിപ്പ് ഡിസംബറില് കൊച്ചിയില് നടത്തും. സന്തോഷ് ട്രോഫിയുടെ ഫൈനല് റൗണ്ട് അടുത്ത വര്ഷം ആദ്യമാണ് നടക്കുക. ഫൈനൽ ഉൾപ്പെടെ 23 മത്സരങ്ങൾ ഉണ്ടാവും. മഞ്ചേരി പയ്യനാട് സ്റ്റേഡിയത്തില് ഫൈനല് നടക്കും.
ലോകകപ്പ് യോഗ്യതാ റൗണ്ടില് മത്സരിക്കാന് ഒരുങ്ങുന്ന ഇന്ത്യന് അണ്ടര് 16 ടീമിന്റെ ക്യാമ്പ് കേരളത്തില് നടത്താന് എഐഎഫ്എഫ് തയ്യാറാണ്. ആഴ്ചയില് ഒരു ദിവസം, പ്രാദേശിക ടീമുകള്ക്ക് ദേശീയ ടീമുമായി മത്സരിക്കാനും അവസരം നല്കും. ദേശീയ വനിതാ സീനിയര് ടീം ക്യാമ്പും കേരളത്തില് നടക്കും.