അന്തരിച്ച കേരള കോണ്ഗ്രസ് നേതാവ് കെഎം മാണിയുടെ മൃതദേഹം കൊച്ചിയിലെ ലേക്ക് ഷോര് ആശുപത്രിയില് നിന്നും വിലാപയാത്രയായി കോട്ടയത്തേക്ക് പുറപ്പെട്ടു.
ഇന്നലെ വൈകിട്ട് മരിച്ച ശേഷം മോര്ച്ചറിയില് സൂക്ഷിച്ച കെഎം മാണിയുടെ ഭൗതികദേഹം ഇന്ന് രാവിലെ ഒന്പതരയോടെ പുറത്തെടുത്തു. ആശുപത്രിയില് പൊതുദര്ശനത്തിന് വച്ച മൃതദേഹത്തില് നൂറുകണക്കിന് ആളുകള് ആദരാജ്ഞലികള് അര്പ്പിച്ചു. ആശുപത്രിയിലെത്തിയ നേതാക്കള്ക്കും പ്രവര്ത്തകര്ക്കും കാണാനായി അല്പസമയം മൃതദേഹം പൊതുദര്ശനത്തിന് വയ്ക്കും എന്നായിരുന്നു ആദ്യം അറിയിച്ചതെങ്കിലും ആളുകളുടെ തിരക്ക് കാരണം പൊതുദര്ശനം അരമണിക്കൂറിലേറെ നീണ്ടു.
രമേശ് ചെന്നിത്തല,പിജെ ജോസഫ്, ഷാഫി പറമ്പില്, കെ.ബാബു, മോന്സ് ജോസഫ്, തോമസ് ഉണ്ണിയാടന്, അനൂപ് കുരുവിള ജോണ്, പിടി തോമസ് തുടങ്ങിയ നിരവധി നേതാക്കള് കെഎം മാണിക്ക് ആദരാജ്ഞലി അര്പ്പിക്കാന് ആശുപത്രിയിലെത്തിയിരുന്നു.
