ബെംഗളൂരു : വിരാട് കോഹ്ലി തിളങ്ങിയ ഐപിഎൽ മത്സരത്തിൽ ദില്ലി ക്യാപിറ്റൽസിനെതിരെ ഭേദപ്പെട്ട വിജയ ലക്ഷ്യമുയർത്തി റോയൽ ചലഞ്ചേഴ്സ് ബാംഗ്ലൂർ. നിശ്ചിത 20 ഓവറിൽ ആറ് വിക്കറ്റ് നഷ്ടത്തിൽ 174 റൺസാണ് ആർസിബി നേടിയത്. ടോസ് നേടിയ ദില്ലി ക്യാപ്റ്റൻ ഡേവിഡ് വാർണർ ബാംഗ്ലൂരിനെ ബാറ്റിങ്ങിനയക്കുകയായിരുന്നു
ഓപ്പണർമാരായ വിരാട് കോഹ്ലിയും (34 പന്തിൽ 50), ക്യാപ്റ്റൻ ഫാഫ് ഡുപ്ലെസിയും (16 പന്തിൽ 22) ചേർന്നു മികച്ച തുടക്കമാണ് ബാംഗ്ലൂരിനു നൽകിയത്. പവർപ്ലേയ്ക്കുള്ളിൽ ഡുപ്ലെസിയെ നഷ്ടമായെങ്കിലും ഒന്നാം വിക്കറ്റിൽ അപ്പോഴേക്കും ഇരുവരും ചേർന്ന് 42 റൺസ് സ്കോർബോര്ഡിൽ കൂട്ടിച്ചേർത്തിരുന്നു. അർധസെഞ്ചുറിക്ക് ശേഷം ഒരു റൺ പോലും സ്കോർ ചെയ്യാനാകാതെ 11–ാം ഓവറിൽ കോഹ്ലി പുറത്തായത് ആർസിബിക്കു തിരിച്ചടിയായി. മഹിപാൽ ലോംറോറും (18 പന്തിൽ 26) ഗ്ലെൻ മാക്സ്വെലും (14 പന്തിൽ 24) ചേർന്ന് സ്കോറിങ് ഉയർത്തിയെങ്കിലും നീണ്ട സമയം ക്രീസിൽ പിടിച്ച് നിൽക്കാനായില്ല.
ബാറ്റിങ് ഓർഡറിൽ സ്ഥാനക്കയറ്റം ലഭിച്ച ഹർഷൽ പട്ടേൽ (4 പന്തിൽ 6), ദിനേഷ് കാർത്തിക് (പൂജ്യം) എന്നിവരും ഇന്ന് ബാറ്റിങ്ങിൽ പരാജയമായി. ഷഹബാസ് അഹമ്മദ് (12 പന്തിൽ 20), അനൂജ് റാവത്ത് (22 പന്തിൽ 15) എന്നിവർ പുറത്താകാതെ നിന്നു. ദില്ലിക്കായി മിച്ചൽ മാർഷ്, കുൽദീപ് യാദവ് എന്നിവർ രണ്ടു വിക്കറ്റ് വീതവും ലളിത് യാദവ്, അക്ഷർ പട്ടേൽ എന്നിവർ ഓരോ വിക്കറ്റ് വീതവും വീഴ്ത്തി.
