കൂടത്തായി: കൂടത്തായി കൊലപാതക പരമ്പരയില് ഇന്ന് അഞ്ചാം കുറ്റപത്രം സമര്പ്പിക്കും. ടോം തോമസ് വധക്കേസിലാണ് കുറ്റപത്രം സമര്പ്പിക്കുക. 2008 ഓഗസ്റ്റ് 26നാണ് പൊന്നാമറ്റം തറവാടിലെ ടോം തോമസ് മരിച്ചത്. വീടും സ്വത്തും സ്വന്തമാക്കാനായി ടോം തോമസിന് ഗുളികയില് സയനൈഡ് ചേര്ത്ത് നല്കി കൊലപ്പെടുത്തുകയായിരുന്നു.
ജോളിയുടെ ആദ്യ ഭര്ത്താവ് റോയ് തോമസിന്റെ പിതാവ് ടോം തോമസിന്റെ കൊലപാതകത്തിലാണ് ഇന്ന് താമരശേരി മജിസ്ട്രേറ്റ് കോടതിയില് കുറ്റപത്രം സമര്പ്പിക്കുന്നത്. സ്വത്ത് തട്ടിയെടുക്കുക എന്ന ഉദ്ദേശത്തോടെയാണ് ടോം തോമസിനെ കൊലപ്പെടുത്തിയതെന്നാണ് കുറ്റപത്രം. മഷ്റൂം ക്യാപ്സ്യൂളില് സയനൈഡ് നിറച്ച് നല്കിയാണ് ടോം തോമസിനെ ജോളി കൊന്നതെന്ന് കുറ്റപത്രത്തില് പറയുന്നു. വീട്ടിലെ സന്ധ്യാ പ്രാര്ത്ഥനയ്ക്ക് മുമ്പാണ് ജോളി ഗുളിക നല്കിയത്. പ്രാര്ത്ഥനയ്ക്കിടയില് ടോം തോമസ് കുഴഞ്ഞ് വീണു. പിന്നീട് ആശുപത്രിയില് എത്തിച്ചെങ്കിലും മരിച്ചു.
ജോളി ഒന്നാം പ്രതിയും സയനൈഡ് കൈമാറിയ എം.എസ് മാത്യു രണ്ടാം പ്രതിയും സയനൈഡ് എത്തിച്ച് നല്കിയ പ്രജുകുമാര് മൂന്നാം പ്രതിയുമായാണ് കുറ്റപത്രം. 170 ലധികം സാക്ഷിമൊഴികളുടെ അടിസ്ഥാനത്തിലാണ് കുറ്റപത്രം തയ്യാറാക്കിയിരിക്കുന്നത്. ജോളിയുടെ മകന് റെമോ പ്രധാന സാക്ഷി. ക്യാപ്സ്യൂള് നല്കുന്നത് കണ്ടുവെന്ന റെമോയുടെ മൊഴിയും കുറ്റപത്രത്തിലുണ്ട്. ആദ്യം ഓടിയെത്തിയ അയല്ക്കാരും ആശുപത്രിയിലേക്ക് കൊണ്ട്പോയ ഓട്ടോ ഡ്രൈവറുമെല്ലാം സാക്ഷികളുടെ കൂട്ടത്തിലൂണ്ട്.2008 ഓഗസ്റ്റ് 26നാണ് പൊന്നാമറ്റം തറവാടിലെ ടോം തോമസ് കൊല്ലപ്പെടുന്നത്.
