തലസ്ഥാനത്ത് കെഎസ്ആർടിസി ബസിന്റെ ടയർ ഊരിത്തെറിച്ച സംഭവം;മൂന്ന് ജീവനക്കാർക്ക് സസ്‌പെൻഷൻ

തിരുവനന്തപുരം:സർവീസിനിടെ കെഎസ്ആർടിസി ബസിന്റെ ടയർ ഊരിത്തെറിച്ച സംഭവത്തിൽ മൂന്ന്
ജീവനക്കാർക്ക് സസ്‌പെൻഷൻ.വിഴിഞ്ഞം ഡിപ്പോയിലെ മെക്കാനിക്കുമാരായ റിങ്കിൽ ടോബി, അരുൺലാൽ, വി ജി ഗോപകുമാർ എന്നിവരെയാണ് പ്രഥമദൃഷ്ടിയിൽ കുറ്റക്കാരെന്ന് കണ്ടെത്തി അന്വേഷണവിധേയമായി സസ്പെൻഡ് ചെയ്തത്.മൂന്നുപേരും വാഹനപരിപാലനത്തിൽ ഗുരുതര വീഴ്ച വരുത്തിയത് കൊണ്ടാണ് അപകടം ഉണ്ടായത് എന്നാണ് കണ്ടെത്തൽ. ടയറിന്റെ കാലപ്പഴക്കമാണ് അപകടകാരണമെന്നാണ് നിഗമനം.

കഴിഞ്ഞ ചൊവ്വാഴ്ചയായിരുന്നു സംഭവം.വെടിവെച്ചാൻ കോവിലിൽ വെച്ചാണ് ബസിന്റെ ടയർ ഊരിപ്പോയത്. ഡ്രൈവർ ബ്രേക്കിട്ട് ഉടൻ വണ്ടി നിർത്തിയതിനാൽ വലിയ അപകടമാണ് ഒഴിവായത്. വിഴിഞ്ഞത്ത് നിന്നും നാഗർകോവിലിലേക്ക് പോകുകയായിരുന്നു ബസ്.