ഗുജറാത്തിന് ഇത് സുവര്‍ണ്ണദിനം; അഹമ്മദാബാദ്, സൂററ്റ് മെട്രോ റെയിൽ പദ്ധതികളുടെ ഭൂമിപൂജ ചടങ്ങ് ഇന്ന്

ദില്ലി: അഹമ്മദാബാദ് മെട്രോ റെയിൽ പദ്ധതി രണ്ടാം ഘട്ടത്തിനും, സൂററ്റ് മെട്രോ റെയിൽ പദ്ധതിക്കുമായുള്ള ഭൂമിപൂജ ചടങ്ങ് പ്രധാനമന്ത്രി നരേന്ദ്ര മോദി ഇന്ന് നിര്‍വ്വഹിക്കും. വീഡിയോ കോൺഫറന്‍സിങ് വഴിയായിരിക്കും ചടങ്ങുകള്‍ നടക്കുക. അതേസമയം മെട്രോ പദ്ധതികൾ ഗുജറാത്തിലെ രണ്ട് നഗരങ്ങളിലേക്ക് പരിസ്ഥിതി സൗഹൃദ ബഹുജന ദ്രുത ഗതാഗത സംവിധാനം പ്രദാനം ചെയ്യുമെന്ന് പ്രധാനമന്ത്രിയുടെ ഓഫീസ് അറിയിച്ചു.

രണ്ട് ഇടനാഴികളുള്ള അഹമ്മദാബാദ് മെട്രോ റെയിൽ പദ്ധതി ഘട്ടം -2 ന് 28.25 കിലോമീറ്റർ നീളമുണ്ട്. 22.8 കിലോമീറ്റർ നീളമുള്ള ഇടനാഴി -1 മോട്ടേര സ്റ്റേഡിയം മുതൽ മഹാത്മാ മന്ദിർ വരെയും 5.4 കിലോമീറ്റർ നീളമുള്ള ഇടനാഴി II ജി‌എൻ‌എൽ‌യു മുതൽ ജിഫ്റ്റ് സിറ്റി വരെയുമാണ്. രണ്ടാം ഘട്ട പദ്ധതിയുടെ മൊത്തം ചെലവ് 5,384 കോടി രൂപയാണെന്ന് പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയിൽ പറയുന്നു. എന്നാല്‍ 40.35 കിലോമീറ്റർ നീളമുള്ള സൂററ്റ് മെട്രോ റെയിൽ പദ്ധതിക്ക് രണ്ട് ഇടനാഴികളാണുളളത്. 21.61 കിലോമീറ്റർ നീളമുള്ള ഇടനാഴി -1 സർത്താന മുതൽ ഡ്രീം സിറ്റി വരെയാണ്, 18.74 കിലോമീറ്റർ നീളമുള്ള ഇടനാഴി -2 ഭേസൻ മുതൽ സരോലി വരെയാണ്. പദ്ധതിയുടെ മൊത്തം ചെലവ് 12,020 കോടി രൂപയാണെന്ന് പ്രധാനമന്ത്രിയുടെ ഓഫീസ് അറിയിച്ചു.