ലോക്സഭാ തെരഞ്ഞെടുപ്പിന്റെ അവസാനത്തെയും ഏഴാമത്തെയും ഘട്ട പോളിംഗ് നാളെ നടക്കാനിരിക്കെ, പോളിംഗ് കഴിഞ്ഞതിന് ശേഷം പുറത്തുവരുന്ന എക്സിറ്റ് പോള്ഫലങ്ങൾ ബഹിഷ്കരിക്കുമെന്ന് കോണ്ഗ്രസ്. നാളെ ദൃശ്യമാധ്യമങ്ങളിൽ നടക്കാനിരിക്കുന്ന ചര്ച്ചകളില് കോണ്ഗ്രസ് പ്രതിനിധികള് പങ്കെടുക്കില്ലെന്നാണ് പാർട്ടിയുടെ അറിയിപ്പ്. എഐസിസി മീഡിയ ആന്ഡ് പബ്ലിസിറ്റി ഡിപ്പാര്ട്മെന്റ് ചെയര്മാന് പവന് ഖേരയാണ് ഇക്കാര്യം അറിയിച്ചത്.
“വോട്ടെടുപ്പ് പൂര്ത്തിയായി, വിധി നിശ്ചിതമാണ്. ജൂണ് നാലിന് ഫലം വരും. അതിനുമുമ്പ് നടക്കുന്ന ടെലിവിഷന് റേറ്റിങ്ങിനുവേണ്ടിയുള്ള ഊഹാപോഹങ്ങളിലും മുഷ്ടിയുദ്ധത്തിലും പങ്കാളിയാവാന് ഒരുകാരണവും കാണുന്നില്ല- പവന് ഖേര എക്സില് കുറിച്ചു. ജൂണ് നാലുമുതല് ചര്ച്ചകളില് പങ്കെടുക്കുമെന്നും അദ്ദേഹം വ്യക്തമാക്കി.
ഏഴാംഘട്ട വോട്ടിങ് പൂര്ത്തിയാവുന്നതോടെ നാളെ വൈകീട്ട് ആറുമണിമുതല് വിവിധ ഏജന്സികളുടെ എക്സിറ്റ് പോള് ഫലങ്ങള് വന്നുതുടങ്ങും. ജൂണ് നാലിനാണ് വോട്ടെണ്ണല്.
