പ്രളയകാലത്ത് കേരളത്തിലേക്ക് നീണ്ട കരുതൽ; ബിപിൻ റാവത്തിനെ കേരളം ഓർക്കുമ്പോൾ..

തിരുവനന്തപുരം: 2018ലെ പ്രളയത്തിൽ കേരളം വിറങ്ങലിച്ചു നിൽക്കുമ്പോൾ കരുതലിന്റെയും ആശ്വാസത്തിന്റെയും കാര്യങ്ങൾ നീട്ടിയ സൈനിക മേധാവിയായിരുന്നു ജനറൽ ബിപിൻ റാവത്ത് .

അന്നദ്ദേഹം കരസേനാ മേധാവിയായിരുന്നു. പ്രളയദുരിതം രൂക്ഷമായപ്പോഴാണ് മുഖ്യമന്ത്രി പിണറായി വിജയൻ കരസേനയുടെ സഹായം തേടിയത്. കേരളത്തിലെ ഉന്നത സൈനിക ഉദ്യോഗസ്ഥരുമായുള്ള മുഖ്യമന്ത്രിയുടെ യോഗത്തിനു തൊട്ടുപിന്നാലെ ദുരന്ത നിവാരണ അതോറിറ്റി മെംബർ സെക്രട്ടറി ഡോ. ശേഖർ എൽ.കുര്യാക്കോസിന്റെ മൊബൈൽ ഫോണിലേക്ക് നമ്പർ തെളിയാത്ത ഒരു കോൾ വന്നു.

പത്തു മിനിട്ടോളം നീണ്ടു നിന്ന സംഭാഷണത്തിൽ അദ്ദേഹം പ്രളയബാധിത പ്രദേശങ്ങളുടെയും അവിടങ്ങളിൽ നടത്തിയിട്ടുള്ള സേനാ വിന്യാസത്തെയും കുറിച്ചുള്ള വിശദാംശങ്ങൾ ചോദിച്ചറിഞ്ഞു
സേനയുടെ ഭാഗത്തുനിന്നുള്ള കൂടുതൽ സഹായങ്ങൾ അദ്ദേഹം അന്ന് വാഗ്ദാനം ചെയ്തിരുന്നു . കീഴ് വഴക്കങ്ങളിലില്ലാത്ത ഇടപെടലുകളാണ് പ്രളയ കാലത്ത് ജനറൽ റാവത്ത് കേരളത്തിനുവേണ്ടി ചെയ്തത്.

സംയുക്തസേനാ മേധാവിയായ ശേഷം അദ്ദേഹം അവസാനമായി പങ്കെടുത്ത പൊതുപരിപാടികളിലൊന്ന് കേരള പൊലീസിന്റെ സൈബർ സമ്മേളനമായ ‘കൊക്കൂൺ’ ആയിരുന്നു. കഴിഞ്ഞ മാസം 12 ന് വീഡിയോ കോൺഫറൻസിലാണ് അദ്ദേഹം സമ്മേളനം ഉദ്ഘാടനം ചെയ്തത്.

ഇന്ന് അദ്ദേഹത്തിന്റെ മരണ വാർത്തയിൽ രാജ്യം വിറങ്ങലിച്ചു നിൽക്കുമ്പോൾ വിദ്വേഷ കമെന്റുകളുമായി വന്നു നിറയുന്നവരിൽ കൂടുതൽ മലയാളികളാണ് എന്നത് വിഷമിപ്പിക്കുന്ന യാഥാർഥ്യമാണ് .