കാമുകിയെ കൊലപ്പെടുത്തി; മൃതദേഹം കുഴിച്ചുമൂടുന്നതിനിടെ ഹൃദയാഘാതം ഉണ്ടായി അറുപതുകാരൻ മരിച്ചു

വാഷിംഗ്ടൺ: കാമുകിയെ കൊലപ്പെടുത്തി കുഴിച്ചുമൂടുന്നതിനിടെ കാമുകനായ അറുപതുകാരന് ഹൃദയാഘാതം വന്ന് മരിച്ചു. ഇയാളുടെ കാമുകിയായ 65 കാരിയായ പെട്രീഷ്യ ഡെന്റ് ആണ് കൊല്ലപ്പെട്ടത്. യുഎസിലെ സൗത്ത് കരോളിനയിലാണ് ഞെട്ടിക്കുന്ന സംഭവം നടന്നത്. ജോസഫ് മക്കിനോൺ എന്ന 60 കാരനാണ് മരിച്ചത്.

ഇയാൾ കാമുകിയെ കഴുത്ത് ഞെരിച്ച് കൊന്നതിന് ശേഷം വീടിന്റെ മുറ്റത്ത് കുഴിച്ചിടാൻ തയ്യാറെടുക്കുകയായിരുന്നു. എന്നാൽ പെട്ടെന്ന് ഇയാൾക്ക് ഹൃദയാഘാതം ഉണ്ടാവുകയും മരണപ്പെടുകയുമായിരുന്നു.

മുറ്റത്ത് അനക്കമില്ലാതെ ഒരാൾ കിടക്കുന്നുവെന്ന റിപ്പോർട്ടിന്റെ അടിസ്ഥാനത്തിൽ പോലീസ് എത്തിയപ്പോഴാണ് ഇയാളെ കണ്ടെത്തിയത്. തുടർന്ന് സംഭവത്തിൽ അന്വേഷണം നടത്തിയപ്പോൾ സമീപത്ത് നിന്നും മറ്റൊരു മൃതദേഹം കുഴിച്ചിട്ട നിലയിൽ കണ്ടെത്തുകയായിരുന്നു. വിശദമായ പരിശോധനയിലാണ് ഇയാൾക്കൊപ്പം താമസിച്ചിരുന്ന പെട്രീഷ്യ ഡെന്റാണ് അത് എന്ന് കണ്ടെത്തിയത്.