കൊച്ചി: നയതന്ത്ര ചാനല് വഴി സ്വര്ണം കടത്തിയ കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിന്റെ അറസ്റ്റ് ഇന്ന് കസ്റ്റംസ് രേഖപ്പെടുത്തും. എന്ഫോഴ്സ്മെന്റ് കേസില് ശിവശങ്കര് ജുഡീഷ്യല് കസ്റ്റഡിയില് കഴിയുന്ന കാക്കനാട് ജില്ലാ ജയിലില് എത്തിയാണ് അറസ്റ്റ് രേഖപ്പെടുത്തുക.
ഇതിനിടെ വിദേശത്തേക്ക് ഡോളര് കടത്തിയ കേസില് സ്വപ്നയെയും സരിതിനെയും കസ്റ്റഡിയില് വിട്ടു കിട്ടണമെന്ന കസ്റ്റംസിന്റെ അപേക്ഷ ഇന്ന് സാമ്പത്തിക കുറ്റകൃത്യങ്ങള് കൈകാര്യം ചെയ്യുന്ന കൊച്ചിയിലെ കോടതി പരിഗണിക്കും. രണ്ടു പേരെയും വീഡിയോ കോണ്ഫറന്സിലൂടെ ഹാജരാക്കാന് കോടതി നിര്ദ്ദേശിച്ചിട്ടുണ്ട്. ശിവശങ്കറിന്റെ അറസ്റ്റ് രേഖപ്പെടുത്താന് ഇന്നലെ കോടതി അനുമതി നല്കിയെങ്കിലും സാങ്കേതിക കാരണങ്ങളാല് ഇന്നത്തേക്ക് മാറ്റുകയായിരുന്നു. അറസ്റ്റിനു ശേഷം കസ്റ്റഡിയില് ചോദ്യം ചെയ്യാനും കോടതിയില് കസ്റ്റംസ് അപേക്ഷ നല്കും