വാഹനാപകടം: നടി മലൈക അറോറയെ ആശുപത്രിയിൽ പ്രവേശിപ്പിച്ചു

മുംബൈ: ബോളിവുഡ് നടി മലൈക അറോറയ്ക്ക് വാഹനാപകടത്തിൽ പരിക്ക്. നിസാര പരിക്കുകളോടെ ചികിത്സയ്ക്കായി അപ്പോളോ ആശുപത്രിയിൽ പ്രവേശിപ്പിച്ചതായി പോലീസ് അറിയിച്ചു. എക്‌സ്പ്രസ് വേയിൽ ഖോപോളിയിൽ വെച്ച് മൂന്ന് വാഹനങ്ങൾ തമ്മിൽ കൂട്ടിയിടിക്കുകയായിരുന്നു.

മുംബൈ-പൂനെ എക്‌സ്പ്രസ് വേയിൽ 38 കിലോമീറ്റർ പോയിന്റിലാണ് അപകടമുണ്ടായത്. മൂന്ന് വാഹനങ്ങൾ പരസ്പരം ഇടിക്കുകയായിരുന്നു. ഇടിയുടെ ആഘാതത്തിൽ ഈ മൂന്ന് വാഹനങ്ങൾക്കും കേടുപാടുകൾ സംഭവിച്ചിട്ടുണ്ട്.

അതേസമയം അപകടം നടന്നയുടൻ വാഹനമോടിച്ചവർ ഓടി രക്ഷപ്പെട്ടു. വാഹനത്തിലുള്ളവർക്ക് എല്ലാവർക്കും നിസാര പരിക്കുകളേറ്റിട്ടുണ്ടെന്ന് ഖോപോളി പോലീസ് സ്റ്റേഷനിലെ പോലീസ് ഇൻസ്പെക്ടർ ശിരീഷ് പവാർ പറഞ്ഞു. അപകടം എങ്ങനെ സംഭവിച്ചുവെന്ന് അന്വേഷിച്ച ശേഷം എഫ്‌ഐആർ രജിസ്റ്റർ ചെയ്യുംമെന്ന് ഖോപോളി പോലീസ് സ്റ്റേഷനിലെ അസിസ്റ്റന്റ് പോലീസ് ഇൻസ്പെക്ടർ ഹരേഷ് കൽസേക്കർ പറഞ്ഞു.