ഗോത്രാചാരങ്ങളുടെപേരിൽ വിവാഹിതയായത് ഒന്നാംവയസിൽ; 21 -ാം വയസ്സിൽ വിവാഹ മോചനം നൽകി കോടതി, വിധിക്ക് നന്ദി പറഞ്ഞ് യുവതി രംഗത്ത്

ജയ്പൂർ : ഗോത്രാചാരങ്ങളുടെപേരിൽ ഒന്നാം വയസിൽ വിവാഹിതയാകേണ്ടി വന്ന യുവതിക്ക് വിവാഹമോചനം നൽകി കോടതി. 21 കാരിയായ യുവതിക്കാണ് രാജസ്ഥാനിലെ കുടുംബ കോടതി വിവാഹ മോചനം നൽകിയത്. പ്രായപൂർത്തിയായതിന് പിന്നാലെ വിവാഹ ജീവിതം ആരംഭിക്കാൻ ബന്ധുക്കൾ നിർബന്ധിച്ചതിന് പിന്നാലെയാണ് യുവതി കോടതിയെയും സമീപിച്ചത്. പ്രിസൈഡിങ് ഓഫീസർ പ്രദീപ് കുമാർ മോദിയാണ് വിവാഹം റദ്ദാക്കിയത്.

യുവതിയുടെ മുത്തച്ഛന്റെ മരണ സമയത്താണ് ഗ്രാമത്തിലെ ഒരു യുവാവുമായി യുവതിയുടെ വിവാഹം കുടുംബം നടത്തിയത്. ഈ സമയം പെൺകുട്ടിക്ക് ഒരു വയസുമാത്രമായിരുന്നു പ്രായം. യുവതി പ്രായപൂർത്തി ആയതിന് പിന്നാലെ വിവാഹ ചടങ്ങ് പൂർത്തിയാക്കണം എന്ന് ആവശ്യപ്പെട്ട് ബന്ധുക്കൾ രംഗത്ത് എത്തിയിരുന്നു.

എന്നാൽ പഠിക്കാൻ ആഗ്രഹിച്ച യുവതി പഠനത്തിന് വീട്ടുകാർ തടസ്സം നിൽക്കുന്നു എന്ന് ചൂണ്ടിക്കാട്ടിയായിരുന്നു കോടതിയെ സമീപിച്ചത്. എന്നാൽ, ശൈശവ വിവാഹം ഇതുവരെ തുടച്ചു നീക്കപ്പെട്ടിട്ടില്ലെന്നും എല്ലാവരും ഇതിനെതിരെ പ്രവർത്തിക്കണം എന്നും കോടതി ഉത്തരവിൽ വ്യക്തമാക്കുന്നുണ്ട്.

ഉത്തരവിന് പിന്നാലെ വിധിയ്‌ക്ക് നന്ദി പറഞ്ഞ് യുവതി രംഗത്ത് എത്തിയിരുന്നു. ഇനി മുതൽ തന്റെ ശ്രദ്ധ പഠനത്തിലായിരിക്കും എന്നും യുവതി കൂട്ടിച്ചേർക്കുകയും ചെയ്തു. പക്ഷെ, പെൺകുട്ടി വിവാഹത്തിന് സമ്മതിക്കാതിരുന്നതോടെ ഗ്രാമത്തിലുള്ളവർ ജാതി പഞ്ചായത്ത് കൂടിയിരുന്നു. തുടർന്ന് ഈ പഞ്ചായത്ത് ആൺ കുട്ടിയുടെ ബന്ധുക്കൾക്ക് പത്ത് ലക്ഷം രൂപ പിഴയായി പെൺകുട്ടിയുടെ കുടുംബം നൽകണം എന്ന് ഉത്തരവ് നൽകിയിരുന്നു.