മട്ടാഞ്ചേരിയിലെ വ്‌ളോഗർക്ക് എട്ടിന്റെ പണികിട്ടിയത് ഫോൺ മോഷണം പോയതോടെ; കഞ്ചാവ് ഉപയോഗിക്കുന്നതിനെക്കുറിച്ച് സംസാരിച്ച പ്രമുഖ വ്‌ളോഗർ കുടുങ്ങിയതിങ്ങനെ…

കൊച്ചി: പ്രായപൂർത്തിയാകാത്ത പെൺകുട്ടിയോട് കഞ്ചാവ് ഉപയോഗിക്കുന്നതിനെക്കുറിച്ച് സംസാരിച്ച വ്‌ളോഗർ എക്‌സൈസിന്റെ പിടിയിലായത് അവിചാരിതമായി. പെൺകുട്ടിയുടെ മോഷണം പോയ ഫോണിൽ നിന്ന് പഴയ ലൈവ് വീഡിയോ ചോർന്നതോടുകൂടിയാണ് വ്‌ളോഗർ പോലീസിന്റെ വലയിലാകുന്നത്. വ്ലോഗറും പെൺകുട്ടിയും തമ്മിൽ കഞ്ചാവ് ഉപയോഗത്തെപ്പറ്റി സംസാരിക്കുന്ന വീഡിയോ സമൂഹമാദ്ധ്യമങ്ങളിൽ പ്രചരിച്ചിരുന്നു. ഇതിനെ തുടർന്നാണ് എക്സൈസ് ഉദ്യോഗസ്ഥർ ഇയാളെ ഫോർട്ട്കൊച്ചിയിലെ വീട്ടിലെത്തി അറസ്റ്റ് ചെയ്യുന്നത്.

ട്രെയിൻ യാത്രയ്‌ക്കിടെയാണ് പെൺകുട്ടിയുടെ ഫോൺ മോഷണം പോകുന്നത്. അടുത്ത ദിവസം രാവിലെ മുതൽഇരുവരുടെയും ദൃശ്യങ്ങൾ സമൂഹമാദ്ധ്യമങ്ങളിൽ പ്രചരിക്കാൻ ആരംഭിച്ചു. ഇതുമായി ബന്ധപ്പെട്ടുള്ള രേഖാമൂലമുള്ള പരാതിയും കാട്ടൂർ പോലീസിന് ലഭിച്ചു.

മട്ടാഞ്ചേരി പുത്തൻ പുരയ്‌ക്കൽ ഫ്രാൻസിസ് നെവിൻ അഗസ്റ്റിനെ (34) വീട്ടിലെത്തിയാണ് എക്‌സൈസ് സംഘം അറസ്റ്റ് ചെയ്തത്. ഇയാളിൽ നിന്ന് കഞ്ചാവും പിടിച്ചെടുത്തു. സോഷ്യൽ മീഡിയ ലൈവിലൂടെ പ്രായപൂർത്തിയാകാത്ത പെൺകുട്ടിയോടാണ് ഇയാൾ കഞ്ചാവിനെപ്പറ്റി സംസാരിച്ചത്. തുടർന്ന് കുട്ടിയെ കഞ്ചാവ് വലിക്കാൻ പ്രേരിപ്പിക്കുകയും ഒരുമിച്ചിരുന്ന് കഞ്ചാവ് വലിക്കാൻ കുട്ടിയെ ക്ഷണിക്കുകയും ചെയ്തു.

പെൺകുട്ടിയുടെ ഫോണിൽ നിന്നാണ് വീഡിയോ ദൃശ്യങ്ങൾ ചോർന്നതെന്ന് അന്വേഷണത്തിൽ വ്യക്തമായിട്ടുണ്ട്. സൈബർ സെല്ലിന്റെ സഹായത്തോടെയാണ് കേസ്അന്വേഷണം പുരോഗമിക്കുന്നത്.