കണ്ണൂർ: മാവേലി എക്സ്പ്രസിന്‍റെ എൻജിൻ കാക്കയിടിച്ച് തകരാറിലായി. തുടർന്ന് ഒന്നര മണിക്കൂർ ട്രെയിൻ വൈകുകയും ചെയ്തു. വെള്ളിയാഴ്ച പുലർച്ചെയാണ് കാക്ക ഇടിച്ചതിനെ തുടർന്ന് ഒന്നരമണിക്കൂറോളം തലശ്ശേരി സ്റ്റേഷനിൽ നിർത്തിയിട്ടത്. പകരം കണ്ണൂരിൽ നിന്ന് എത്തിച്ച എൻജിൻ ഘടിപ്പിച്ചാണ് യാത്ര പുനരാരംഭിച്ചത്. പുലർച്ചെ 4.55ന് തലശ്ശേരി റെയിൽവേ സ്റ്റേഷനിലെത്തിയപ്പോഴാണ് എൻജിനെ വൈദ്യുതിക്കമ്പിയുമായി ബന്ധിപ്പിക്കുന്ന ഭാഗമായ പാന്‍റോഗ്രാഫ് കാക്കയിടിച്ച് തകരാറിലായത്.
ഇതിന് പിന്നാലെ 5.30 ന് ഒന്നാമത്തെ പ്ലാറ്റ്‌ഫോമിനോട് ചേർന്നുള്ള പാളത്തിൽ വരേണ്ട ചെന്നൈ-മംഗളൂരു വണ്ടി മധ്യത്തിലെ പാളത്തിലേക്ക് കടത്തിവിട്ടു. ഈ വണ്ടിയിലേക്ക് പ്ലാറ്റ് ഫോമിൽനിന്ന് ഒന്നാമത്തെ പാളത്തിലേക്കിറങ്ങിമാത്രമേ കയറാനാകുകയുള്ളൂ. യാത്രക്കാരുടെ സൗകര്യം പരിഗണിച്ച് 10 മിനിറ്റ് നിർത്തിയിട്ട്, എല്ലാവരും കയറിയെന്നുറപ്പാക്കിയ ശേഷമാണ് വണ്ടി സ്റ്റേഷൻ വിട്ടത്. കണ്ണൂരിൽനിന്ന് ഡീസൽ എൻജിനെത്തിച്ച് ഘടിപ്പിച്ച് 6.35ന് മാവേലി യാത്ര തുടരുകയും ചെയ്തു.
