കുടുംബശ്രീയുടെ മറവില്‍ വന്‍ സാമ്പത്തിക തട്ടിപ്പ്; അക്കൗണ്ടന്റിന് സസ്പെന്‍ഷൻ

കൊല്ലം: കുടുംബശ്രീയുടെ മറവില്‍ സാമ്പത്തിക തട്ടിപ്പ് നടത്തിയ അക്കൗണ്ടന്റിന് സസ്പെന്‍ഷൻ. നിലമേല്‍ പഞ്ചായത്തിലെ കുടുംബശ്രീയുടെ മറവില്‍ നടത്തിയ വന്‍ സാമ്പത്തിക തട്ടിപ്പാണ് കണ്ടെത്തിയത്. രണ്ട് ലക്ഷത്തിലേറെ രൂപയുടെ തിരിമറി കണ്ടെത്തിയതിനെ തുടര്‍ന്ന് കുടുംബശ്രീ അക്കൗണ്ടന്‍റിനെ സസ്പെന്‍ഡ് ചെയ്തു. സിപിഎം ഭരണത്തിലിരുന്ന സിഡിഎസ് നേതൃത്വം കോണ്‍ഗ്രസ് പിടിച്ചെടുത്തതിനു പിന്നാലെ നടന്ന പരിശോധനയിലാണ് തട്ടിപ്പ് കണ്ടെത്തിയത്. അക്കൗണ്ടന്‍റായി കരാര്‍ അടിസ്ഥാനത്തില്‍ ജോലി ചെയ്യുന്ന റസീനയെയാണ് പഞ്ചായത്ത് ഭരണ സമിതി സസ്പെന്‍ഡ് ചെയ്തത്.

കഴിഞ്ഞ വര്‍ഷം ജൂണ്‍ മുതല്‍ ആഗസ്റ്റ് വരെയുളള കണക്കുകളുടെ പരിശോധനയിലാണ് തട്ടിപ്പ് മനസ്സിലായത്. ജൂണ്‍ മാസത്തില്‍ 96830 രൂപയുടെയും, ജൂലൈയില്‍ 50000 രൂപയുടെയും ആഗസ്റ്റ് മാസത്തില്‍ 1,00,600 രൂപയുടെയും ക്രമക്കേടാണ് കണ്ടെത്തിയത്. സിഡിഎസ് ചുമതലയുളള പഞ്ചായത്ത് അസിസ്റ്റന്‍റ് സെക്രട്ടറിയുടെ വ്യാജ ഒപ്പിട്ട് അക്കൗണ്ടന്‍റ് പണം തട്ടുകയായിരുന്നുവെന്നാണ് നിഗമനം.

അടുത്തിടെ നടന്ന തിരഞ്ഞെടുപ്പിലാണ് സിപിഎം നേതൃത്വം ഭരിച്ചിരുന്ന സിഡിഎസ് ഭരണസമിതി കോണ്‍ഗ്രസ് പിടിച്ചെടുത്തത്. ഇതേ തുടര്‍ന്നായിരുന്നു സാമ്പത്തിക ഇടപാടുകള്‍ പരിശോധനയ്ക്ക് വിധേയമാക്കിയത്. കേസിൽ സിപിഎം അംഗങ്ങള്‍ക്കും പങ്കുണ്ടെന്നാണ് കോണ്‍ഗ്രസ് ആരോപണം. പരാതിയുടെ അടിസ്ഥാനത്തില്‍ പോലീസ് അന്വേഷണം തുടങ്ങിയിട്ടുണ്ട്.