തിരുവനന്തപുരം: കോണ്ഗ്രസ് നാഥനില്ലാക്കളരിയായെന്നു തുറന്നടിച്ച ശശി തരൂർ എംപിക്കു മറുപടിയുമായി കെപിസിസി അധ്യക്ഷൻ മുല്ലപ്പള്ളി രാമചന്ദ്രൻ. തരൂർ അങ്ങനെയൊരു അഭിപ്രായം പറയാൻ പാടില്ലായിരുന്നെന്നും ഇങ്ങനെയൊരു അഭിപ്രായം പറയുംമുന്പ് തരൂർ കോണ്ഗ്രസ് നേതൃത്വവുമായി സംസാരിക്കണമായിരുന്നെന്നും മുല്ലപ്പള്ളി രാമചന്ദ്രന് പറഞ്ഞു.
രാഹുൽ ഗാന്ധി പാർട്ടി അധ്യക്ഷനായി തുടരണമെന്നാണു കെപിസിസിയുടെ അഭിപ്രായം. താരാരാധന കൊണ്ടല്ല അദ്ദേഹം അധ്യക്ഷനായി തുടരണമെന്ന് ആവശ്യപ്പെടുന്നത്. പ്രവർത്തനമികവും നേതൃപാടവവും മനസിലാക്കിയതുകൊണ്ടാണ്. രാഹുൽ ഗാന്ധി ഇപ്പോഴും നേതൃനിരയിൽ സജീവമായുണ്ടെന്നും മുല്ലപ്പള്ളി പറഞ്ഞു. നാഥനില്ലെന്ന പ്രസ്താവന കോണ്ഗ്രസിനെ കുറിച്ചു തരൂരിന് അറിയാത്തതുകൊണ്ടാണെന്നും അദ്ദേഹം കോണ്ഗ്രസിന്റെ ചരിത്രം വായിക്കണമെന്നും മുല്ലപ്പള്ളി പരിഹസിച്ചു.