ചെന്നൈയിൽ വൻ വജ്രവേട്ട; അഞ്ച് കോടി രൂപ വിലമതിക്കുന്ന വജ്രം കടത്താൻ ശ്രമം; യാത്രക്കാരനെ തന്ത്രപൂർവ്വം പിടികൂടി കസ്റ്റംസ്

ചെന്നൈ: ചെന്നൈ എയര്‍പോര്‍ട്ടിൽ കോടിക്കണക്കിന് രൂപയുടെ വജ്രവേട്ട (Diamonds Seized) . വിമാനത്താവളത്തിലെത്തിയ യാത്രക്കാരനിൽ നിന്നാണ് അഞ്ച് കോടി രൂപ വിലമതിക്കുന്ന വജ്രം കസ്റ്റംസ് പിടികൂടിയത്. യാത്രക്കാരനെ പോലീസ് അറസ്റ്റ് ചെയ്തു.1052.72 കാരറ്റ് മൂല്യമുള്ള 5.76 കോടി രൂപയുടെ വജ്രമാണ് യാത്രക്കാരനിൽ നിന്നും പിടികൂടിയത്.

കുട്ടികളെ ഇരുത്തി കൊണ്ടുപോകാവുന്ന സ്‌ട്രോളർ സ്യൂട്ട്‌കേസിന്റെ കൈപ്പിടിയിൽ ഒളിപ്പിച്ച നിലയിലായിരുന്നു വജ്രം. 22 ചെറിയ പ്ലാസ്റ്റിക് പാക്കറ്റുകളിലായിട്ടാണ് വജ്രം സൂക്ഷിച്ചിരുന്നത്. ഇകെ-543 വിമാനത്തിൽ ദുബായിലേക്ക് പോകാനായിരുന്നു യാത്രക്കാരൻ എയർപോർട്ടിലെത്തിയത്. എന്നാൽ സംശയം തോന്നിയ ഇയാളെ എയർ ഇന്റലിജൻസ് യൂണിറ്റ് പിടികൂടുകയായിരുന്നു. ദുബായിലേക്കുള്ള യാത്രക്കാരന്റെ പക്കൽ വജ്ര ശേഖരമുണ്ടെന്ന രഹസ്യ വിവരം ഇന്റലിജൻസിന് നേരത്തെ ലഭിച്ചിരുന്നു. ഇതിനെത്തുടർന്നാണ് പരിശോധന നടത്തിയതും, ഇയാളെ പിടികൂടിയതും. പ്രതിയെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല.