ദില്ലി; ബിജെപി യുടെ അംഗത്വ വിതരണ പരിപാടിയുടെ ഉദ്ഘാടനവുമായി ബന്ധപ്പെട്ടും വിവിധ പരിപാടികളില് പങ്കെടുക്കാനുമായി പ്രധാനമന്ത്രി നരേന്ദ്ര മോദി ഇന്ന് വാരണാസിയിലെത്തുന്നു. വീണ്ടും അധികാരത്തില് എത്തിയ ശേഷം ഇത് രണ്ടാമത്തെ തവണയാണ് മോദി തീര്ത്ഥാടന കേന്ദ്രം കൂടിയായ തന്റെ മണ്ഡലത്തിലെത്തുന്നത്.
‘നമുക്കെല്ലാം പ്രചോദനമായ ശ്യാമപ്രസാദ് മുഖര്ജിയുടെ ജന്മദിനത്തിലാണ് ബിജെപി അംഗത്വ പരിപാടിക്ക് തുടക്കമാവുന്നത്. ഈ പരിപാടിയില് കാശിയില് ഞാന് പങ്കുചേരും. ജീവിതത്തിലെ എല്ലാ തുറയിലുംപെട്ട ബിജെപി കുടുംബാംഗങ്ങളെ കൂടുതല് ബന്ധിപ്പിക്കുന്നതാകും അംഗത്വ വിതരണ പരിപാടി. അത് നമ്മുടെ പാര്ട്ടിയെ കൂടുതല് ശക്തപ്പെടുത്തും’ മോദി ട്വീറ്റ് ചെയ്തു.
രാവിലെ പത്ത് മണിക്ക് വാരണാസിയിലെത്തിയ മോദി വിമാനത്താവളത്തിലെ ലാല് ബഹാദൂര് ശാസ്ത്രിയുടെ പ്രതിമ അനാച്ഛാദനം ചെയ്തു. മാന് മഹല് മ്യൂസിയവും മോദി സന്ദര്ശിക്കും.
