നവകേരള സദസ്സ് മർദനക്കേസ്! പിണറായി വിജയന്റെ മുൻ ഗൺമാനും സംഘത്തിനുമെതിരെ നരഹത്യാശ്രമക്കുറ്റം! കുരുക്ക് മുറുക്കി എസ്‌ഐടി

ആലപ്പുഴ: മുൻ മുഖ്യമന്ത്രി പിണറായി വിജയൻ നയിച്ച നവകേരള യാത്രയ്ക്കിടെ ആലപ്പുഴയിൽ വെച്ച് യൂത്ത് കോൺഗ്രസ് – കെ.എസ്.യു പ്രവർത്തകരെ മർദിച്ച സംഭവത്തിൽ ഉദ്യോഗസ്ഥർക്കെതിരെ കടുത്ത നടപടിയുമായി പ്രത്യേക അന്വേഷണ സംഘം. ഗൺമാരുൾപ്പെടെ പ്രതികളായ അഞ്ച് പോലീസ് ഉദ്യോഗസ്ഥർക്കെതിരെയും ജാമ്യമില്ലാ വകുപ്പായ നരഹത്യാശ്രമക്കുറ്റം എസ്‌ഐടി ചുമത്തി. പ്രതികൾക്ക് കോടതിയിൽ നിന്ന് മുൻകൂർ ജാമ്യം ലഭിക്കാനുള്ള സാധ്യതകൾ പൂർണ്ണമായും ഇല്ലാതാക്കുന്നതിനാണ് അന്വേഷണ സംഘം പുതിയ വകുപ്പുകൾ ഉൾപ്പെടുത്തി ആലപ്പുഴ ഫസ്റ്റ് ക്ലാസ് മജിസ്ട്രേറ്റ് കോടതിയിൽ റിപ്പോർട്ട് സമർപ്പിച്ചത്. നരഹത്യാ ശ്രമത്തിൽ പരിക്കേറ്റിട്ടുള്ളതിനാൽ ഏഴുവർഷം വരെ തടവ് ശിക്ഷ ലഭിക്കാവുന്ന കടുത്ത കുറ്റമാണിത്.

കേസിൽ കൃത്യമായ വകുപ്പുകൾ ചുമത്തി റിപ്പോർട്ട് സമർപ്പിക്കാത്തതിന് കഴിഞ്ഞ ദിവസം അന്വേഷണ ഉദ്യോഗസ്ഥനെ കോടതി രൂക്ഷമായി ശകാരിച്ചിരുന്നു. ഇതിന് തൊട്ടുപിന്നാലെയാണ് പുതിയ വകുപ്പുകൾ ചേർത്തുള്ള എസ്‌ഐടിയുടെ അടിയന്തര നടപടി. കേസിലെ പ്രധാന പ്രതികളായ മുൻ ഗൺമാൻ ഇൻസ്പെക്ടർ എസ്. അനിൽകുമാർ, അകമ്പടിസേനാംഗങ്ങളായിരുന്ന ഗ്രേഡ് സീനിയർ സിവിൽ പോലീസ് ഓഫീസർ എസ്. സന്ദീപ്, സിവിൽ പോലീസ് ഓഫീസർമാരായ അരുൺ, വിപിൻ, ഷൈജു എന്നിവരെ കഴിഞ്ഞ ദിവസം സർവീസിൽ നിന്നും സസ്പെൻഡ് ചെയ്തിരുന്നു. പ്രത്യേക അന്വേഷണസംഘം മേധാവി ആലപ്പുഴ ക്രൈംബ്രാഞ്ച് എസ്.പി. ഷൗക്കത്തലിയുടെ കണ്ടെത്തലുകളുടെ അടിസ്ഥാനത്തിൽ സംസ്ഥാന പോലീസ് മേധാവി റവാഡ ചന്ദ്രശേഖറാണ് സസ്പെൻഷൻ ഉത്തരവിറക്കിയത്.

2023 ഡിസംബർ 15-നായിരുന്നു കേരള രാഷ്ട്രീയത്തിൽ വൻ വിവാദങ്ങൾക്ക് വഴിവെച്ച ഈ മർദനം അരങ്ങേറിയത്. നവകേരള സദസ്സിന്റെ ഔദ്യോഗിക ബസ് കടന്നുപോയപ്പോൾ ആലപ്പുഴ ജനറൽ ആശുപത്രി ജങ്ഷനിൽ കരിങ്കൊടി കാണിച്ച് പ്രതിഷേധിച്ച യൂത്ത് കോൺഗ്രസ് പ്രവർത്തകരെയാണ് ലോക്കൽ പോലീസിന്റെ സാന്നിധ്യത്തിൽ സുരക്ഷാ ഉദ്യോഗസ്ഥർ ക്രൂരമായി തല്ലിച്ചതച്ചത്. വി.ഐ.പി ബസിന് പിന്നാലെയുള്ള കാറിൽ നിന്ന് ചാടിയിറങ്ങിയ ഗൺമാനും സംഘവും ലാത്തിയും ഇടിയവണ്ടിയും ഉപയോഗിച്ച് തങ്ങളെ വളഞ്ഞിട്ട് മർദിക്കുകയായിരുന്നുവെന്ന് പരിക്കേറ്റ കെ.എസ്.യു. ജില്ലാ പ്രസിഡന്റ് എ.ഡി. തോമസും യൂത്ത് കോൺഗ്രസ് സംസ്ഥാന ജനറൽ സെക്രട്ടറി അജയ് ജുവൽ കുര്യാക്കോസും മൊഴി നൽകിയിരുന്നു. അന്നത്തെ കടുത്ത മർദനമുറകളെ ‘രക്ഷാപ്രവർത്തനം’ എന്ന് വിശേഷിപ്പിച്ച് ഭരണകൂടം ന്യായീകരിച്ച കേസിൽ, കടുത്ത നിയമനടപടികളിലേക്ക് എസ്‌ഐടി കടന്നത് ഉദ്യോഗസ്ഥർക്ക് വലിയ തിരിച്ചടിയാവുകയാണ്.