കാസര്ഗോഡ്: ശ്രീലങ്കയില് ഇരുന്നുറിലധികം പേരുടെ മരണത്തിനിടയാക്കിയ സ്ഫോടന പരമ്പരയുമായി ബന്ധപ്പെട്ട് കാസര്കോട് ദേശീയ അന്വേഷണ ഏജന്സി (എന്ഐഎ) യുടെ റെയ്ഡ്. വിദ്യാനഗര് സ്വദേശികളായ രണ്ടു പേരുടെ വീടുകളിലാണ് എന്ഐഎയുടെ കൊച്ചി സംഘം റെയ്ഡ് നടത്തിയത്. ഇവരുടെ മൊബൈല് ഫോണുകള് ഉള്പ്പെടെയുള്ളവ പിടിച്ചെടുത്തു.
വിശദമായ ചോദ്യം ചെയ്യലിന് ഇരുവരും തിങ്കളാഴ്ച കൊച്ചിയിലെ ഓഫീസില് ഹാജരാകണമെന്നും എന്ഐഎ നിര്ദേശിച്ചു. സ്ഫോടന പരമ്പരയുടെ മുഖ്യ സൂത്രധാരന് സഹ്റാന് ഹാഷിമുമായി ഇരുവര്ക്കും ബന്ധമുണ്ടായിരുന്നുവെന്നാണ് എന്ഐഎ സംശയിക്കുന്നത്. അതേസമയം, സ്ഫോടന പരമ്പരയില് പങ്കെടുത്ത ഭീകരര് 2017ല് രണ്ട് തവണ ഇന്ത്യയില് എത്തിയിരുന്നതായും രഹസ്യാന്വേഷണ റിപ്പോര്ട്ടുണ്ട്. കേരളത്തിലും തമിഴ്നാട്ടിലുമാണ് ഇവര് സന്ദര്ശനങ്ങള് നടത്തിയിരുന്നതെന്നാണ് ഇതില് പറയുന്നത്.