ദില്ലി: നൈജീരിയൻ സർക്കാർ പിടിച്ചെടുത്ത ഹിറോയിക് ഇഡുൻ കപ്പലിലെ മലയാളികൾ ഉൾപ്പെടെയുള്ള
കപ്പൽ ജീവനക്കാരുടെ മോചനം വൈകാൻ സാധ്യത. കപ്പൽ ജീവനക്കാരെ മോചിപ്പിക്കാനുള്ള നിയമകുരുക്കുകളാണ് മോചനം വൈകുന്നത്.
പ്രശ്നപരിഹാരം തേടി കപ്പൽ ജീവനക്കാർ അന്താരാഷ്ട്ര ട്രിബ്യൂണലിനെ സമീപിച്ചതോടെ, നിയമപരമായ തീർപ്പുണ്ടാകട്ടെ എന്ന നിലപാടിലേക്ക് നൈജീരിയ നീങ്ങിയിട്ടുണ്ട്. ഇതിനിടെ, വന് സൈനിക വലയത്തില് 3 മലയാളികള് ഉള്പ്പടെ 26 കപ്പല് ജീവനക്കാരെ നൈജീരിയയിലും എത്തിച്ചു.
കഴിഞ്ഞ ഓഗസ്റ്റ് 12നാണ് ഹിറോയിക് ഇഡുന് എന്ന ഓയിൽ കപ്പല് ദുരൂഹ സാഹചര്യത്തില് ഇക്വറ്റോറിയല് ഗിനി പിടികൂടിയത്. തുടർന്ന് സംഭവം പുറം ലോകം അറിഞ്ഞിട്ട് വിദേശകാര്യമന്ത്രാലയം നയതന്ത്ര ഇടപെടലുകൾ ശക്തമായി നടത്തുകയാണ്. പിടിയിലായ കപ്പല് ജീവനക്കാരെ നേരിട്ട് ഫോണില് വിളിച്ച് വിവരങ്ങള് ആരാഞ്ഞെന്നും എംഇഎ വ്യക്തമാക്കി.
നിയമവിരുദ്ധമായി കപ്പൽ പിടിച്ചെടുത്തെന്നും ജീവനക്കാരെ തടവിലാക്കിയെന്നും കാണിച്ച് കപ്പൽ കമ്പനി നേരത്തെ അന്താരാഷ്ട്ര ട്രിബ്യൂണലിനെ സമീപിച്ചിരുന്നു. നൈജീരിയയിലെ ഫെഡറല് കോടതിയിലും കേസുണ്ട്. ഈ കേസുകളിൽ തീരുമാനമാകട്ടെ, എന്നിട്ടാകാം മറ്റ് നടപടികൾ എന്ന നിലപാടിലേക്ക് നൈജീരിയ നീങ്ങിയതോടെ നയതന്ത്ര നീക്കങ്ങളെല്ലാം തടസ്സപ്പെട്ടിരിക്കുകയാണ്.