ദില്ലി : ഭാരതത്തിന്റെ വികസന ചരിത്രത്തിൽ പുതിയൊരു അധ്യായം കുറിച്ചുകൊണ്ട്, തുടർച്ചയായ ഒമ്പതാം ബജറ്റ് പ്രസംഗത്തിൽ രാജ്യം പിന്തുടരുന്ന ‘അവകാശ അധിഷ്ഠിത’ ശൈലിയെ ‘ചുമതല അധിഷ്ഠിത’ ശൈലിയിലേക്ക് മാറ്റിയെഴുതി ധനമന്ത്രി നിർമല സീതാരാമൻ. കർത്തവ്യ ഭവനിൽ വെച്ച് നടത്തിയ പ്രസംഗത്തിൽ ‘കർത്തവ്യ കാലം’ എന്ന ആശയം അവതരിപ്പിച്ച ധനമന്ത്രി, 2047-ഓടെ വികസിത ഭാരതം എന്ന സ്വപ്നം യാഥാർത്ഥ്യമാക്കാൻ മൂന്ന് പ്രധാന കർത്തവ്യങ്ങൾ രാജ്യത്തിന് മുന്നിൽ വെച്ചു. പാവപ്പെട്ടവർ, പിന്നാക്കം നിൽക്കുന്നവർ, പാർശ്വവൽക്കരിക്കപ്പെട്ടവർ എന്നിവരെ ശാക്തീകരിക്കുന്നതിനുള്ള ദൃഢനിശ്ചയമാണ് 2026-27 ബജറ്റിന്റെ ആണിക്കല്ലെന്ന് നിർമല സീതാരാമൻ പ്രഖ്യാപിച്ചു.
സാമ്പത്തിക വളർച്ച ത്വരിതപ്പെടുത്തുകയും അത് നിലനിർത്തുകയും ചെയ്യുക എന്നതാണ് ധനമന്ത്രി മുന്നോട്ടുവെച്ച ആദ്യ കർത്തവ്യം. ആഗോളതലത്തിലെ സാമ്പത്തിക അസ്ഥിരതകൾക്കിടയിലും ഇന്ത്യയുടെ ഉൽപ്പാദനക്ഷമതയും മത്സരക്ഷമതയും വർദ്ധിപ്പിച്ച് ലോകത്തെ ഏറ്റവും വേഗത്തിൽ വളരുന്ന സമ്പദ്‌വ്യവസ്ഥയായി രാജ്യത്തെ നിലനിർത്തുകയാണ് ഇതിലൂടെ ലക്ഷ്യമിടുന്നത്. ജനങ്ങളുടെ അഭിലാഷങ്ങൾ നിറവേറ്റുക എന്നതാണ് രണ്ടാമത്തെ കർത്തവ്യം. കേവലം സ്വപ്നങ്ങൾ നൽകുന്നതിന് പകരം പൗരന്മാരുടെ കഴിവുകൾ വർദ്ധിപ്പിക്കുകയും തൊഴിൽ നൈപുണ്യം നൽകുകയും വഴി ഓരോ വ്യക്തിയെയും രാജ്യത്തിന്റെ വികസനത്തിൽ സജീവ പങ്കാളിയാക്കാൻ സർക്കാർ ലക്ഷ്യമിടുന്നു. എല്ലാവർക്കും വിഭവങ്ങളും അവസരങ്ങളും ഉറപ്പാക്കുക എന്ന തുല്യനീതിയുടെ കർത്തവ്യമാണ് മൂന്നാമത്തേത്. വികസനത്തിന്റെ ഫലങ്ങൾ നഗരങ്ങളിൽ മാത്രം ഒതുങ്ങാതെ ഗ്രാമങ്ങളിലേക്കും സാധാരണ കുടുംബങ്ങളിലേക്കും എത്തിച്ചേരുന്നു എന്ന് ഉറപ്പാക്കാൻ ‘സബ്കാ സാത്ത് സബ്കാ വികാസ്’ എന്ന മന്ത്രം സർക്കാർ ഉയർത്തിപ്പിടിക്കുന്നു.
യുവശക്തിക്ക് മുൻഗണന നൽകുന്ന ബജറ്റാണിതെന്ന് വിശേഷിപ്പിച്ച ധനമന്ത്രി, സാമ്പത്തിക വളർച്ചയെ തൊഴിലവസരങ്ങളായും സംരംഭകത്വ അവസരങ്ങളായും മാറ്റാനാണ് ഊന്നൽ നൽകിയത്. ഗ്രാമീണ വികസനം, കാർഷിക ഉൽപ്പാദനം, ചെറുകിട-ഇടത്തരം സംരംഭങ്ങൾ (MSME) എന്നിവയ്ക്ക് നൽകുന്ന പിന്തുണയിലൂടെ സാധാരണക്കാരുടെ ജീവിതനിലവാരം ഉയർത്താൻ ബജറ്റ് ലക്ഷ്യമിടുന്നു. ആരോഗ്യപരിരക്ഷയും പാർപ്പിടവും ഓരോ കുടുംബത്തിന്റെയും അടിസ്ഥാന ആവശ്യമായി കണ്ട് അവ എല്ലാവരിലും എത്തിക്കുമെന്ന് ധനമന്ത്രി ഉറപ്പുനൽകി.
