‘തുടർ ഭരണം കിട്ടി’; സംസ്ഥാനത്തെ സൗജന്യ ഭക്ഷ്യക്കിറ്റ് വിതരണം നിര്‍ത്തലാക്കി സർക്കാർ; പദ്ധതി ആലോചനയിൽ പോലുമില്ലെന്ന് ഭക്ഷ്യമന്ത്രി

റേഷൻ കടകളിലൂടെ നൽകിയിരുന്ന കിറ്റ് വിതരണം അവസാനിപ്പിക്കുന്നതായി ഭക്ഷ്യമന്ത്രി ജി ആർ അനിൽ. പിണറായി വിജയന് തുടർ ഭരണം ലഭിക്കുന്നതിൽ പ്രധാന പങ്കുവഹിച്ച ഒന്നായിരുന്നു കിറ്റ് വിതരണം. റേഷൻ കട വഴിയുള്ള കിറ്റ് ഇനി ഉണ്ടാകില്ലെന്ന് മന്ത്രി ജി ആർ അനിൽ വ്യക്തമാക്കി. കോവിഡ് കാലത്തെ സ്തംഭനാവസ്ഥ പരിഗണിച്ചാണ് കിറ്റ് നൽകിയതെന്നും, വിലക്കയറ്റത്തിന്റെ സാഹചര്യത്തിൽ കിറ്റ് നൽകില്ലെന്നും മന്ത്രി ഒരു സ്വകാര്യ ചാനലിനോട് സംസാരിക്കവെ വ്യക്തമാക്കി

കൊവിഡ് കാലത്ത് ജോലി പോലുമില്ലാതെ ആളുകൾ വീട്ടിലിരുന്ന കാലത്താണ് റേഷൻ കടകൾ വഴിയുള്ള കിറ്റ് വിതരണം സർക്കാർ ആരംഭിച്ചത്. ജനങ്ങൾക്ക് ഇപ്പോൾ ജോലി ചെയ്യാനുള്ള സാഹചര്യമുണ്ട്. പച്ചക്കറിയുടെയും മറ്റ് നിത്യോപയോഗ സാധനങ്ങളുടെയും വില വർധിച്ചത് സർക്കാർ ഗൗരവത്തോടെയാണ് കാണുന്നത്. സാധ്യമായ എല്ലാ വിപണി ഇടപെടലുകളും സർക്കാർ നടത്തുമെന്നും മന്ത്രി വ്യക്തമാക്കി.

കോവിഡ് വ്യാപനം തുടരുന്നതിനാൽ ദാരിദ്ര്യ രേഖയ്ക്ക് താഴെയുള്ള കുടുംബങ്ങൾക്കെങ്കിലും ഭക്ഷ്യക്കിറ്റ് നൽകണമെന്ന് ഭക്ഷ്യവകുപ്പ് നിർദേശിച്ചിരുന്നു. എന്നാൽ, ഇനിയും കിറ്റ് വിതരണം തുടരാൻ ആവില്ലെന്ന് ഓണക്കാലത്തുതന്നെ ധനകാര്യവകുപ്പ് അഡീഷണൽ ചീഫ് സെക്രട്ടറി ഓണക്കിറ്റിന് പണം അനുവദിക്കുന്നത് സംബന്ധിച്ച ഫയലിൽ രേഖപ്പെടുത്തിയിരുന്നു.