മത്സ്യത്തൊഴിലാളിയുടെ മീൻകുട്ട വലിച്ചെറിഞ്ഞ സംഭവം: നഗരസഭാ ജീവനക്കാര്‍ക്ക് കാരണം കാണിക്കല്‍ നോട്ടീസ്

തിരുവനന്തപുരം: ആറ്റിങ്ങലിൽ നഗരസഭാ ജീവനക്കാർ ലോക്ഡൗണ്‍ ലംഘനത്തിന്റെ പേരില്‍ റോഡുവക്കിൽ കച്ചവടം ചെയ്തുകൊണ്ടിരുന്ന അൽഫോൻസിയ എന്ന മത്സ്യത്തൊഴിലാളിയുടെ മത്സ്യം തട്ടിത്തെറിപ്പിച്ച സംഭവത്തിൽ നഗരസഭാ ജീവനക്കാര്‍ക്ക് കാരണം കാണിക്കല്‍ നോട്ടീസ്. മുബാറക്, ഷിബു എന്നിവര്‍ക്കാണ് നടപടി സ്വീകരിക്കാൻ കാരണം വ്യക്തമാക്കാന്‍ ആവശ്യപ്പെട്ട് നഗരസഭ അദ്ധ്യക്ഷന്‍ നോട്ടീസ് നല്‍കിയത്. രണ്ട് ദിവസത്തിനകം കാരണം ബോധിപ്പിക്കണമെന്നാണ് നിര്‍ദ്ദേശം.

അൽഫോൻസിയയുടെ മീന്‍കുട്ട ചവിട്ടിതെറിപ്പിച്ച സംഭവത്തിൽ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ രണ്ട് അംഗ സമിതിയെ നിയോഗിച്ചിരുന്നു. ഇവരുടെ അന്വേഷണ റിപ്പോര്‍ട്ട് ലഭിച്ചതിന് പിന്നാലെയാണ് നഗരസഭയുടെ നടപടി. ഇരുവരും ചേര്‍ന്നാണ് അവനവന്‍ചേരി സ്വദേശിനിയുടെ മീന്‍കുട്ട ചവിട്ടിതെറിപ്പിച്ചത്.

അതേസമയം ആളുകളുടെ കണ്ണില്‍ പൊടിയിടാനണ് കാരണം കാണിക്കല്‍ നോട്ടീസ് നല്‍കിയതെന്ന് ആക്ഷന്‍ കൗണ്‍സില്‍ ആരോപിച്ചു. ഇതേതുടർന്ന് നഗരസഭാ ജീവനക്കാരുടെ അതിക്രമത്തില്‍ പ്രതിഷേധിച്ച്‌ അഞ്ചുതെങ്ങിലെ മത്സ്യത്തൊഴിലാളികള്‍ തുറമുടക്കി പ്രതിഷേധിച്ചു. മത്സ്യത്തൊഴിലാളി സ്ത്രീകൾക്കെതിരായ അതിക്രമങ്ങളിൽ അധികൃതർ യാതൊരു നടപടിയും സ്വീകരിക്കുന്നില്ലെന്നും പ്രതിഷേധക്കാർ ആരോപിച്ചു. നഗരസഭാ ജീവനക്കാര്‍ക്കെതിരെ നടപടി സ്വീകരിക്കുന്നതുവരെ സമരം തുടരുമെന്ന് മത്സ്യത്തൊഴിലാളികള്‍ വ്യക്തമാക്കി.

പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona