ജോക്കറായി അഭിനയിച്ച വോക്വിന്‍ ഫീനിക്‌സ് മികച്ച നടനുള്ള ഓസ്‌ക്കര്‍ സ്വന്തമാക്കി. റെനീ സെല്‍വെഗറാണ് മികച്ച നടി.
‘ഞാന്‍ പലരോടും മോശമായി പെരുമാറിയിട്ടുണ്ട്. എനിക്ക് രണ്ടാം തവണ അവസരം നല്‍കിയ എല്ലാവരോടും നന്ദി. അങ്ങനെയാണ് സമൂഹം മുന്നോട്ട് പോകേണ്ടത്. നാം പരസ്പരം വിജ്ഞാനം പങ്കുവയ്ക്കണം, പരസ്പരം സഹകരിച്ചും സഹായിച്ചും മുന്നോട്ട് പോകണം.’-വോക്വിന്‍ ഓസ്‌കാര്‍ വേദിയില്‍ പറഞ്ഞു.
ലിംഗ സമത്വത്തെ കുറിച്ചും ലോകത്ത് നിലനില്‍ക്കുന്ന വര്‍ണ വിവേചനങ്ങളെ കുറിച്ചും ആധിപത്യങ്ങളെ കുറിച്ചും വികാരാധീതനായി സംസാരിച്ചു.
മികച്ച നടിയായി റെനീ സെല്‍വെഗറെ തിരഞ്ഞെടുത്തു. തന്റെ കുടുംബത്തിനും സഹപ്രവര്‍ത്തകര്‍ക്കുമാണ് റെനീ സെല്‍വെഗര്‍ പുരസ്‌ക്കാരം സമര്‍പ്പിച്ചത്. ലോകത്തെ കുടിയേറ്റക്കാര്‍ക്കും റെനീ തന്റെ പുരസ്‌കാരം സമര്‍പ്പിച്ചു.
ലോസ് ആഞ്ചല്‍സിലെ ഡോള്‍ബി തിയറ്ററിലാണ് ചടങ്ങ് നടക്കുന്നത്. ഇന്ത്യന്‍ സമയം 6.30 ഓടെയാണ് പുരസ്‌ക്കാര പ്രഖ്യാപനം ആരംഭിച്ചത്. ഇക്കുറി ഏറ്റവും കൂടുതല്‍ നോമിനേഷനുകള്‍ കിട്ടിയത് ജോക്കറിനാണ്. 11 നോമിനേഷനുകളാണ് ജോക്കറിന് ലഭിച്ചത്. ദ ഐറിഷ് മാന്‍, 1917, വണ്‍സ് അപ്പോണ്‍ എ ടൈം ഇന്‍ ഹോളിവുഡ് എന്നിവയ്ക്ക് പത്ത് നോമിനേഷനുകള്‍ വീതം ലഭിച്ചു.
