തിരുവനന്തപുരം: നാലാമത് പരമേശ്വർജി സ്മാരക പ്രഭാഷണം മാർച്ച് 2 ഞായറാഴ്ച്ച നടക്കും. ഉപരാഷ്ട്രപതി ജഗ്ദീപ് ധൻകർ ആണ് പ്രഭാഷകൻ. തിരുവനന്തപുരം കവടിയാർ ഉദയ് പാലസ് കൺവെൻഷൻ സെന്ററിലാണ് ചടങ്ങ്. ‘ജനാധിപത്യം, ജനസംഖ്യ, വികസനം, ഭാരതത്തിന്റെ ഭാവി’ എന്ന വിഷയത്തിലാണ് പ്രഭാഷണം. രാവിലെ 11 മണിക്കാണ് പ്രഭാഷണം. ഭാരതീയ വിചാരകേന്ദ്രമാണ് ചടങ്ങ് സംഘടിപ്പിക്കുന്നത്.
2022 ലാരംഭിച്ച പരമേശ്വർജി സ്മാരക വാർഷിക പ്രഭാഷണ പരമ്പരയിൽ ഇതിന് മുമ്പ് അന്നത്തെ ഉപരാഷ്ട്രപതി വെങ്കയ്യാ നായിഡു (2022), ധനകാര്യമന്ത്രി നിർമ്മലാ സീതാരാമൻ (2023) വിദേശകാര്യ മന്ത്രി എസ്സ് ജയശങ്കർ (2024) എന്നിവരാണ് പങ്കെടുത്തിട്ടുള്ളത്.
ഭാരതീയ വിചാരകേന്ദ്രത്തിന്റെ സ്ഥാപക ഡയറക്ടറും കേരളത്തിലെ മുതിർന്ന സംഘപ്രചാരകനുമായിരുന്നു പരമേശ്വർജി എന്ന് അടുപ്പക്കാർ വിളിച്ചിരുന്ന പി പരമേശ്വരൻ. ആരോഗ്യപരമായ ആശയ സംവാദങ്ങളുടെ ആവശ്യകത ഉയർത്തിപ്പിടിച്ച പൊതുപ്രവർത്തകനും എഴുത്തുകാരനും കവിയുമായിരുന്നു പരമേശ്വർജി.
