ജനറൽ മനോജ് നരവാനെയുടെ ആത്മകഥ പ്രസിദ്ധീകരിച്ചിട്ടില്ലെന്ന് പെൻഗ്വിൻ റാൻഡം ഹൗസ് ഇന്ത്യ

ദില്ലി: മുൻ ഇന്ത്യൻ സൈന്യാധിപൻ ജനറൽ മനോജ് മുകുന്ദ് നരവാനെയുടെ ആത്മകഥയായ ഫോർ സ്റ്റാർസ് ഓഫ് ടെസ്റ്റിനി എന്ന പുസ്തകം ഇതുവരെ പ്രസിദ്ധീകരിച്ചിട്ടില്ലെന്ന് പെൻഗ്വിൻ റാൻഡം ഹൗസ് ഇന്ത്യ വ്യക്തമാക്കി. പുസ്തകവുമായി ബന്ധപ്പെട്ട് സമീപകാലത്ത് ഉയർന്ന പൊതുചർച്ചകളും മാധ്യമ റിപ്പോർട്ടുകളും തുടർന്നാണ് പ്രസാധകർ ഔദ്യോഗിക വിശദീകരണം നൽകിയത്.
ഫോർ സ്റ്റാർസ് ഓഫ് ടെസ്റ്റിനി എന്ന പുസ്തകത്തിന്റെ ഏക പ്രസിദ്ധീകാരണാവകാശം പെൻഗ്വിൻ റാൻഡം ഹൗസ് ഇന്ത്യയ്ക്കാണെന്നും, അച്ചടി രൂപത്തിലോ ഡിജിറ്റൽ രൂപത്തിലോ ഇതുവരെ ഒരു പകർപ്പും പ്രസിദ്ധീകരിക്കുകയോ വിതരണം ചെയ്യുകയോ വിൽക്കുകയോ ചെയ്തിട്ടില്ലെന്നും പ്രസ്താവനയിൽ പറയുന്നു.
നിലവിൽ ചില പ്ലാറ്റ്ഫോമുകളിൽ പ്രചരിക്കുന്നതായി കാണുന്ന പുസ്തകത്തിന്റെ പകർപ്പുകൾ പൂർണ്ണമായോ ഭാഗികമായോ, അച്ചടി, ഡിജിറ്റൽ, PDF ഉൾപ്പെടെയുള്ള ഏതെങ്കിലും രൂപത്തിൽ പകർപ്പവകാശ ലംഘനമാണെന്ന് പെൻഗ്വിൻ റാൻഡം ഹൗസ് ഇന്ത്യ ചൂണ്ടിക്കാട്ടി. ഇത്തരത്തിലുള്ള അനധികൃത പ്രചരിപ്പിക്കൽ ഉടൻ അവസാനിപ്പിക്കണമെന്നും ആവശ്യപ്പെട്ടു.
പുസ്തകത്തിന്റെ നിയമവിരുദ്ധവും അനുമതിയില്ലാത്തതുമായ വിതരണം നടത്തുന്നവർക്കെതിരെ നിയമപരമായി ലഭ്യമായ എല്ലാ നടപടികളും സ്വീകരിക്കുമെന്നും പ്രസാധകർ അറിയിച്ചു. പ്രസാധകന്റെ ഔദ്യോഗിക നിലപാട് രേഖപ്പെടുത്തുന്നതിനായാണ് ഈ പ്രസ്താവന പുറത്തിറക്കിയതെന്ന് പെൻഗ്വിൻ റാൻഡം ഹൗസ് ഇന്ത്യ വ്യക്തമാക്കി.