വീണ്ടും മദ്യപസംഘത്തിന്റെ അഴിഞ്ഞാട്ടം; 17 കാരനെ നഗ്നനാക്കി കെട്ടിയിട്ട് മർദിച്ചത് മണിക്കൂറുകൾ; നോക്കുകുത്തിയായി പോലീസ്

തിരുവനന്തപുരം: വിവസ്ത്രനാക്കി മരത്തില്‍ കെട്ടി 17 കാരനെ മണിക്കൂറുകളോളം മര്‍ദ്ദിച്ചതായി പരാതി (Boy Attacked In Trivandrum). തലസ്ഥാന ജില്ലയിലാണ് മനഃസാക്ഷിയെപ്പോലും മരവിപ്പിക്കുന്ന ഈ സംഭവം നടന്നത്. പ്ലസ് വൺ വിദ്യാർത്ഥിയെ മദ്യപസംഘം വായിൽ ബലമായി മദ്യമൊഴിച്ച് നൽകിയതിന് ശേഷം നഗ്നനാക്കിയാണ് ക്രൂരമായി മർദ്ദിച്ചത്. സംഭവത്തിൽ നെയ്യാർ ഡാം പോലീസിൽ പരാതി നൽകിയെങ്കിലും ആദ്യം നടപടിയെടുക്കാൻ തയ്യാറായില്ലായിരുന്നു. സംഭവം നടന്ന് നാല് ദിവസം കഴിഞ്ഞപ്പോഴാണ് പോലീസ് മൊഴിയെടുക്കാൻ വിളിപ്പിച്ചതെന്നും എന്ന് വിദ്യാർത്ഥി ആരോപിച്ചു. ഒടുവിൽ സംഭവം പുറത്തുവന്നതോടെ അഞ്ച് പേർക്കെതിരെ കേസെടുത്തതായി പോലീസ് അറിയിച്ചു.

അതേസമയം ബന്ധുവീട്ടിൽ നിന്നും രാത്രി ആറ്റിൽ കുളിക്കാൻ പോയ വിദ്യാർത്ഥിക്കാണ് ദാരുണമായ അനുഭവമുണ്ടായത്. വിദ്യാർത്ഥിയിൽ നിന്നും കഞ്ചാവ് പിടിച്ചെടുത്തെന്ന് പറഞ്ഞ് മൂന്ന് മണിക്കൂറോളം നേരമാണ് ഇവർ കുട്ടിയെ കെട്ടിയിട്ട് മർദ്ദിച്ചത്. മർദ്ദനത്തിന്റെ ദൃശ്യങ്ങൾ മൊബൈലിൽ പകർത്തുകയും ചെയ്‌തെന്ന് വിദ്യാർത്ഥി പറയുന്നു. മദ്യവും വെട്ടുകത്തിയും കുട്ടിയെക്കൊണ്ട് പേടിപ്പിച്ച് ചിത്രങ്ങൾ പകർത്തുകയും, ആരോടെങ്കിലും പറഞ്ഞാൽ ഇത് സമൂഹമാധ്യമങ്ങളിലൂടെ പ്രചരിപ്പിക്കുമെന്ന് പറഞ്ഞ് ഭീഷണിപ്പെടുത്തുകയും ചെയ്തു.

പതിനഞ്ചോളം ആളുകൾ സംഘത്തിലുണ്ടായിരുന്നു എന്നാണ് വിദ്യാർത്ഥി പറയുന്നത്. മർദ്ദനമേറ്റ് അവശനായി വെള്ളം ആവശ്യപ്പെട്ടപ്പോൾ ആറ്റിൽ നിന്നുള്ള വെള്ളമാണ് നൽകിയത്. ജീവനോടെ കുഴിച്ചിടുമെന്ന് സംഘം ഭീഷണിപ്പെടുത്തിയെന്നും വിദ്യാർത്ഥി പറയുന്നു. ഇതിനുശേഷം കുട്ടി ആശുപത്രിയിൽ ചികിത്സയിലായിരുന്നു.