”ഭഗത് സിംഗ്, രാജ്ഗുരു, സുഖ്ദേവ്…. ഈ ധീരന്മാർ എന്നും ഭാരതത്തിന് പ്രചോദനം”; വീരബലിദാനികളെ സ്മരിച്ച് പ്രധാനമന്ത്രി

ദില്ലി: മാതൃരാജ്യത്തിന് വേണ്ടി മരിക്കാനുള്ള ഭഗത് സിംഗ്, രാജ്ഗുരു, സുഖ്ദേവ് എന്നീ ധീരന്മാരുടെ തീരുമാനം പ്രചോദനമെന്ന് പ്രധാനമന്ത്രി നരേന്ദ്രമോദി( PM Modi leads salutes to Bhagat Singh, Sukhdev, Rajguru). വീരബലിദാനികളുടെ 91-ാം ബലിദാന ദിനത്തിൽ ശ്രദ്ധാഞ്ജലി അർപ്പിക്കവെയായിരുന്നു പ്രധാനമന്ത്രിയുടെ പ്രതികരണം. മാതൃരാജ്യത്തിന് വേണ്ടി മരിക്കാനുള്ള അവരുടെ തീരുമാനം എല്ലായ്‌പ്പോഴും രാജ്യത്തെ പ്രചോദിപ്പിക്കുമെന്ന് പ്രധാനമന്ത്രി ട്വിറ്ററിൽ കുറിച്ചു.

പ്രധാനമന്ത്രിയുടെ ട്വീറ്റിന്റെ പൂർണ്ണരൂപം:

“ഭാരത് മാതാവിന്റെ ധീരപുത്രന്മാരായ ഭഗത് സിംഗ്, രാജ്ഗുരു, സുഖ്ദേവ് എന്നിവർക്ക് ആദരാഞ്ജലികൾ. മാതൃരാജ്യത്തിന് വേണ്ടി മരിക്കാനുള്ള അവരുടെ തീരുമാനം എന്നും പ്രചോദനം നൽകും, ജയ് ഹിന്ദ്” പ്രധാനമന്ത്രി കുറിച്ചു.

1931 മാർച്ച് 23നാണ് ഭഗത് സിംഗും രാജ്ഗുരുവും സുഖ്ദേവും ബ്രിട്ടീഷ് ഭരണകൂടത്തിന് മുന്നിൽ നിർഭയം തൂക്കിലേറിയത്. തൂക്കിലേറ്റുമ്പോൾ വെറും 23 വയസ് മാത്രമായിരുന്നു ഭഗത് സിംഗിന്റെ പ്രായം.
അതേസമയം 1928ൽ ബ്രിട്ടീഷ് പോലീസ് ഓഫീസർ ജോൺ സോണ്ടേഴ്സിനെ കൊലപ്പെടുത്തിയ കേസിലാണ് മൂന്ന് പേരെയും തൂക്കിലേറ്റുന്നത്. ലാലാ ലജ്പത് റായിയുടെ മരണത്തിന് കാരണക്കാരനായ ബ്രിട്ടീഷ് പോലീസ് സൂപ്രണ്ട് ജെയിംസ് സ്‌കോട്ടിനെ വധിക്കാൻ മൂവരും പദ്ധതിയിട്ടിരുന്നു. ജെയിംസ് സ്സ്‌കോട്ടാണെന്ന് തെറ്റിധരിച്ചാണ് ഭഗത് സിംഗും കൂട്ടരും ജോൺ സോണ്ടേഴ്സിനെ വധിച്ചത്. വധശിക്ഷ നടപ്പാക്കാൻ നിശ്ചയിച്ചിരുന്ന സമയത്തിന് 11 മണിക്കൂർ മുമ്പാണ് വധശിക്ഷ നടപ്പാക്കിയത്.