കൊളത്തൂര്: മലപ്പുറം ജില്ലയില് കോടികളുടെ മാരക മയക്കുമരുന്നുമായി ഒരാളെ പൊലീസ് അറസ്റ്റ് ചെയ്തു. കോട്ടക്കല് ഒതുക്കങ്ങള് സ്വദേശി കാളങ്ങാടന് സുബൈറിനെ (42)യാണ് അറസ്റ്റ് ചെയ്തത്. ബാംഗ്ലൂര്, വിരാജ്പേട്ട എന്നിവിടങ്ങളില് നിന്ന് ജില്ലയില് വില്പ്പന നടത്താനായി എത്തിച്ച സിന്തറ്റിക് മയക്കുമരുന്ന് ഇനത്തില്പ്പെട്ട എംഡി എം എയുമായാണ് ഇയാളെ കൊളത്തൂര് പൊലീസ് പിടികൂടിയത്.
എം ഡി എം എ, എല് എസ് ഡി സ്റ്റാമ്പുകള് തുടങ്ങിയ സിന്തറ്റിക് മയക്കുമരുന്നുകള് തദ്ദേശീയരായ ഏജന്റുമാര് മുഖേന ജില്ലയിലെത്തിച്ച് വില്പ്പന നടത്തുന്ന കോട്ടക്കല് കേന്ദ്രീകരിച്ച് പ്രവര്ത്തിക്കുന്ന സംഘത്തിലെ ചില കണ്ണികളെ കുറിച്ച് പൊലീസ് നടത്തിയ രഹസ്യ നിരീക്ഷണത്തനിടുവിലാണ് ഇയാള് പിടിയിലായത്.
പടപ്പറമ്പ് ടൗണിന് സമീപത്തു നിന്നാണ് 140 ഗ്രാം എം ഡി എം എയുമായി പ്രതിയെ അറസ്റ്റു ചെയ്തത്. ചെറിയ പാക്കറ്റുകളിലായി അര ഗ്രാമിന് മൂവായിരം രൂപ മുതല് വിലയിട്ടാണ് വില്പ്പന നടത്തുന്നതെന്ന് പൊലീസ് പറഞ്ഞു. യുവാക്കളെ ലക്ഷ്യം വെച്ചുള്ള ഇത്തരം ലഹരിമാഫിയാ സംഘങ്ങളെ കുറിച്ചുള്ള കൂടുതല് വിവരങ്ങള് ശേഖരിച്ച് വരികയാണെന്നും ലഹരി മാഫിയക്കെതിരെ ശക്തമായ നടപടികള് സ്വീകരിക്കുമെന്നും ജില്ലാ പൊലീസ് മേധാവി എസ് സുജിത്ത് ദാസ് അറിയിച്ചു.