സമൂഹ മാധ്യമങ്ങളിലൂടെ വര്‍ഗീയ പ്രചാരണം; പോപ്പുലര്‍ഫ്രണ്ടുകാരന്‍ പിടിയില്‍

ആലപ്പുഴ: സമൂഹ മാധ്യമങ്ങളിലൂടെ വര്‍ഗീയ പ്രചാരണം (Communal Propaganda On Facebook PFI Worker Arrested) നടത്തിയ പോപ്പുലര്‍ഫ്രണ്ടുകാരന്‍ പിടിയില്‍.വര്‍ഗീയ കലാപത്തിന് ആഹ്വാനം നടത്തിക്കൊണ്ട് ഫേസ്ബുക്കിലൂടെ സന്ദേശങ്ങള്‍ പ്രചരിപ്പിച്ച പോപ്പുലര്‍ ഫ്രണ്ടുകാരനാണ് അറസ്റ്റിലായത്.

പ്രയാര്‍ വടക്ക് മുറിയില്‍ കണ്ണമത്ത് കിഴക്ക് വീട്ടില്‍ നൂറുദ്ദീന്‍കുട്ടി മകന്‍ കുഞ്ഞുമോന്‍ എന്ന് വിളിക്കുന്ന ഹര്‍ഷാദ് (35)നെയാണ് കായംകുളം പോലീസ് അറസ്റ്റ് ചെയ്തത്. ആലപ്പുഴയില്‍ ബിജെപി, എസ്ഡിപിഐ നേതാക്കളുടെ കൊലപാതകത്തെ തുടര്‍ന്ന് ഫേസ്ബുക്ക് പ്രൊഫൈല്‍ വഴി വിദ്വേഷകരമായ വാചകങ്ങള്‍ പോസ്റ്റ് ചെയ്ത് പ്രചരിപ്പിച്ച് സമൂഹത്തില്‍ പരസ്പര ലഹള ഉണ്ടാക്കുന്നതിന് ശ്രമിക്കുകയായിരുന്നു.

ഹര്‍ഷാദിന്റെ മൊബൈല്‍ ഫോണ്‍ ഫോറന്‍സിക് ലാബില്‍ അയച്ച് ശാസ്ത്രീയ പരിശോധന നടത്തി തെളിവുകള്‍ ശേഖരിക്കുന്നതിനായി പിടിച്ചെടുത്തു. ഇതിനുപിന്നാലെ ജില്ലയിലെ സാമൂഹിക മാധ്യമങ്ങള്‍ പോലീസ് നിരീക്ഷണത്തിലാണ്. സോഷ്യല്‍ മീഡിയ അക്കൗണ്ടുകള്‍ പോലീസ് പരിശോധിച്ചുവരുന്നു. മതസൗഹാര്‍ദ്ദം തകര്‍ക്കുന്ന പ്രചരണം നടത്തുന്ന വ്യക്തികളും സംഘടനകളും സൈബര്‍ പോലീസിന്റെ നിരീക്ഷണത്തിലാണ്. പ്രകോപനപരമായ സന്ദേശങ്ങള്‍ പ്രചരിപ്പിച്ചാല്‍ കടുത്ത നടപടികള്‍ ഉണ്ടാകുമെന്ന് ജില്ലാ പോലീസ് മേധാവി ജി ജയ്‌ദേവ് അറിയിച്ചു. അതേസമയമ് ഇത്തരം സംഭവങ്ങൾ വ്യാപകമായതുകൊണ്ടുതന്നെ ഇതിനുപിന്നിൽ കൂടുതൽ പേരുണ്ടോ എന്നതുൾപ്പെടെ പോലീസ് അന്വേഷിച്ചുവരികയാണ്.