മെക്സിക്കോയിൽ അതിശക്തമായ ഭൂചലനം; റിക്ടർ സ്കെയിലിൽ 7.4 തീവ്രത, സുനാമി മുന്നറിയിപ്പ് പുറപ്പെടുവിച്ചു

മെക്സിക്കോ സിറ്റി: മെക്സിക്കോയുടെ തെക്കൻ സംസ്ഥാനമായ ചിയാപാസ് തീരത്ത് റിക്ടർ സ്കെയിലിൽ 7.4 തീവ്രത രേഖപ്പെടുത്തിയ അതിശക്തമായ ഭൂചലനം. വെള്ളിയാഴ്ചയുണ്ടായ ശക്തമായ ഭൂചലനത്തെ തുടർന്ന് മേഖലയിൽ സുനാമി മുന്നറിയിപ്പ് പുറപ്പെടുവിച്ചിട്ടുണ്ട്. അയൽരാജ്യങ്ങളായ ഗ്വാട്ടിമാല, എൽ സാൽവഡോർ എന്നിവിടങ്ങളിലും പ്രകമ്പനം അനുഭവപ്പെട്ടു. എന്നാൽ ഭൂചലനത്തിൽ ഇതുവരെ വലിയ നാശനഷ്ടങ്ങളോ ആളപായമോ റിപ്പോർട്ട് ചെയ്യപ്പെട്ടിട്ടില്ലെന്ന് അധികൃതർ വ്യക്തമാക്കി.

മെക്സിക്കൻ നഗരമായ പോർട്ടോ മാഡെറോയ്ക്ക് സമീപമാണ് ഭൂചലനത്തിന്റെ പ്രഭവകേന്ദ്രമെന്നും ഭൂപ്രതലത്തിൽ നിന്ന് വെറും 10 കിലോമീറ്റർ മാത്രം ആഴത്തിലാണ് ഇത് സംഭവിച്ചതെന്നും യുഎസ് ജിയോളജിക്കൽ സർവേ അറിയിച്ചു. ഭൂചലനത്തിന് പിന്നാലെ പ്രഭവകേന്ദ്രത്തിന്റെ 300 കിലോമീറ്റർ ചുറ്റളവിലുള്ള തീരപ്രദേശങ്ങളിൽ അപകടകരമായ സുനാമി തിരമാലകൾക്ക് സാധ്യതയുണ്ടെന്ന് യുഎസ് സുനാമി മുന്നറിയിപ്പ് കേന്ദ്രം മുന്നറിയിപ്പ് നൽകി.

ഭൂചലനത്തെ തുടർന്ന് ഗ്വാട്ടിമാല സിറ്റിയിൽ കെട്ടിടങ്ങൾ ശക്തമായി കുലുങ്ങുകയും പരിഭ്രാന്തരായ ജനങ്ങൾ വീടുകളിൽ നിന്ന് തെരുവുകളിലേക്ക് ഓടിയിറങ്ങുകയും ചെയ്തു. സുരക്ഷാ മാനദണ്ഡങ്ങളുടെ ഭാഗമായി സർക്കാർ ഓഫീസുകളിൽ നിന്നും ജീവനക്കാരെ അടിയന്തിരമായി ഒഴിപ്പിച്ചു. മെക്സിക്കോയിലെ ഒവാഹാക്ക സംസ്ഥാനത്തും ഭൂചലനം അനുഭവപ്പെട്ടെങ്കിലും അവിടെയും കാര്യമായ നാശനഷ്ടങ്ങൾ ഒന്നും ഇതുവരെ റിപ്പോർട്ട് ചെയ്തിട്ടില്ലെന്ന് ഗവർണർ സോളമൻ ജാര അറിയിച്ചു. സ്ഥിതിഗതികൾ അധികൃതർ സൂക്ഷ്മമായി നിരീക്ഷിച്ചു വരികയാണ്.